काठमाडौं (हाम्रो खेलकुद) – साफ च्याम्पियनसिप २०२३ को फाइनलमा मंगलबार आयोजक भारत र कुवेत भिड्दैछन् । समूह चरणमा नेपाललाई हराएका यी दुई टोलीबीच बेंगलोरको कन्तिरभा रंगशालामा साँझ ७:३० बजे उपाधि भिडन्त हुनेछ ।

भारतले सेमिफाइनलमा लेवनानमाथि टाइब्रेकरमा जित हासिल गरेको थियो । समूह ए को उपविजेता भारतले गोलरहित बराबरीपछि सुटआउटमा ४-२ को जित हासिल गरेको थियो । कप्तान सुनिल क्षेत्रीले प्रतियोगितामा गोल नगरेको सेमिफाइनल एकमात्र खेल थियो ।

यता कुवेतले बंगलादेशलाई १-० ले पराजित गर्दै फाइनलमा स्थान बनाएको थियो । निर्धारित ९० मिनेट गोलरहित बराबरीमा सकिएपछि थप गरिएको समयको पहिलो हाफमा कुवेतले विजयी गोल गरेको थियो ।

भारत र कुवेतबीच समूह चरणमा भएको खेल बराबरीमा सकिएको थियो । भारतले सुनिल क्षेत्रीको गोलमा अग्रता लिएपनि इन्ज्युरी समयमा आत्मघाती गोलले घरेलु टोलीलाई समूह विजेता बन्न बन्चित गरेको थियो ।

समूह चरणमा नेपाल भारत र कुवेत दुवैसँग पराजित भएको थियो । कुवेतविरुद्ध ३-१ को हार बेहोरेको नेपाल भारतसँग २-० ले पराजित भएको थियो । अन्तिम खेलमा भने नेपालले पाकिस्तानलाई १-० ले हराएको थियो ।

भारत लगातार दोस्रो पटक र समग्रमा नवौं पटक उपाधि जित्न चाहन्छ । आमन्त्रित टोलीको रुपमा आएको कुवेत भने इतिहास बनाउने सुरमा रहनेछ ।