काठमाडौं (हाम्रो खेलकुद) – आयोजक भारतले साफ च्याम्पियनसिप फुटबलको उपाधि जितेको छ । बैंगलरुको कान्तिरभा रंगशालामा मंगलबार कुवेतलाई सडन डेथमा हराउँदै भारतले नवौं पटक साफ च्याम्पियनसिपको उपाधि जितेको हो ।

निर्धारित समय र थप ३० मिनेटमा १–१ को बराबरी र टाइब्रेकरमा पनि ४–४ को बराबरीपछि खेल सडन डेथमा पुगेको थियो । जहाँ भारतीय गोलकिपर गुरप्रित सिंह नायक रहे । उनले विपक्षी कप्तानको प्रहारलाई रोक्दै टोलीको जित निश्चित गरेका थिए । सडन डेथमा भारतका लागि भने महेश सिंहले गोल गरेका थिए ।

टाइब्रेकरमा भारतका लागि कप्तान सुनिल क्षेत्री, सन्देश झिन्गन, ललियान्जुला, सुबासिस बोस गोल गर्न सफल भए । उदान्त सिंहको प्रहार पोष्टमाथिबाट बाहिरिएको थियो । कुवेतका लागि मोहम्मद अब्दुल्ला पहिलो पेनाल्टीमै गोल गर्न असफल भए । उनको प्रहार क्रसबारमा लागेको थियो । त्यसपछि फवाज अलोलाइबी, अहमद अजिज, अबदुल्ला महरान र साबाहिब अलखाल्दी गोल गर्न सफल भएका थिए । सडन डेथमा कप्तान खालिद हजियाको प्रहार भारतका गोलकिपरले रोके ।

त्यसअघि खेलको १४ औं मिनेटमा साबाहिब अलखाल्दीले गोल गर्दै कुवेतलाई अग्रता दिलाएका थिए । तर पहिलो हाफमै भारत ललियान्जुला चाग्तेले ३९ औं मिनेटमा बराबरी गोल फर्काएका थिए । उत्कृष्ट तालमेलको प्रदर्शन गर्ने क्रममा गोल गर्दै भारत खेलमा फर्किएको थियो ।

साफ च्याम्पियनसिपको इतिहासमा पहिलो पटक दक्षिण एसिया बाहिरका राष्ट्र कुवेत र लेवननको सहभागिता रहेको थियो । लेवननलाई सेमिफाइनलमा भारतले टाइब्रेकरमा हराएको थियो । कुवेत र भारत एकै समूहबाट अघि बढ्दै फाइनल पुगेको थियो ।

भारतले यसअघि सन् १९९३,१९९७,१९९९,२००५,२००९,२०११,२०१५ र २०२१ मा साफ च्याम्पियनसिप जितेको थियो । साफ च्याम्पियनसिपको चौधौं संस्करण समाप्तीमा भारतले सबैभन्दा बढी ९, माल्दिभ्सले २ तथा बंगलादेश, श्रीलंका र अफगानिस्तानले समान १ पटक उपाधि जितेका छन् ।