काठमाडौं (हाम्रो खेलकुद) – नेपाली महिला राष्ट्रिय फुटबल टोलीले आइतबार दोस्रो मैत्रीपुर्ण खेलमा बंगलादेशको सामना गर्दैछ । खेलका लागि प्रशिक्षक अनन्तराज थापाले पछिल्लो खेलबाट तीन परिवर्तन गर्दै सुरुवाती ११ घोषणा गरेका छन् ।

ढाकाको कमलपुरस्थित विरश्रेष्ठ शहिद सिपाही मोहम्मद मुस्तफा कमल स्टेडियममा हुने खेल नेपाली समयअनुअर साँझ ५:१५ बजे सुरु हुनेछ। पहिलो खेलमा सुरुवाती ११ मा स्थान बनाएका रेनुका नगरकोटे, प्रिती राई र अमिसा कार्कीलाई आजको खेलमा विश्राम दिइएको छ ।

फरवार्ड रश्मी कुमारी घिसिङ र अनिता बस्नेत तथा मिडफिल्डमा अनिता केसीले सुरुवाती रोजाइमा स्थान बनाएका छन् । बंगलादेशविरुद्ध आक्रमणमा सावित्रा भण्डारीलाई रश्मी र अनिता बस्नेतले साथ दिनेछन् ।

मिडफिल्डमा सरु लिम्बु, दिपा शाही र अनिता केसी रहनेछन् । डिफेन्समा मुख्य प्रशिक्षकले पहिलो खेलका खेलाडीलाई नै निरन्तरता दिएका छन् । अमृता जैशी र समिक्षा घिमिरे सेन्टर डिफेन्स तथा विमला विक र हिराकुमारी भुजेलले विंगब्याकमा खेल्नेछन् । गोलरक्षकमा कप्तान एन्जिला तुम्बापो सुब्बा रहनेछिन् ।

वैकल्पिक खेलाडीमा डिफेन्डर गीता राना, पुजा राना, निशा थोकर, अञ्चली वाइवा, मिडफिल्डर, विमला चौधरी, सविता रानामगर, रेनुका नगरकोटे, प्रिती राई, अमिसा कार्की बेन्चमा छन् । यस्तै फरवार्ड रेखा पौडेल, तथा गोलरक्षक अञ्जना राना मगर र उषा नाथ वैकल्पिक खेलाडीको रुपमा रहनेछन् ।