काठमाडौं (हाम्रो खेलकुद) – फिफा महिला विश्वकप २०२३ बिहीबारबाट अष्ट्रेलिया र न्युजिल्यान्डमा सुरु भएको छ। नेपाली महिला राष्ट्रिय टोली छनोटको पहिलो चरणबाट बाहिरिएपनि यस प्रतियोगितालाई लिएर अखिल नेपाल फुटबल संघ (एन्फा) विविध कारणले चर्चामा रहँदै आएको छ ।

विश्वकपका लागि फिफाले उपलब्ध गराएको टिकट बाँडफाँडकै प्रक्रियालाई लिएर अनेक विवाद भएपछि कार्यसमितिबाट नै पदाधिकारी, सदस्य र अन्यका लागि टिकटको भागबण्डा गरिएको थियो । महिला विश्वकप हेर्न जानका लागि खरिद गर्ने टिकट पदाधिकारी र एन्फा सम्बद्ध व्यक्ति र संस्थालाई बाँडिएको थियो ।

टिकट खरिद गर्नेले भिसा प्रक्रिया पूरा गरेर अष्ट्रेलिया जाने क्रम सुरु भइसकेको छ । त्यसबाहेक डेढ दर्जन खेल पत्रकार पनि अधिकारिक एक्रेडिटेसन लिएर प्रतियोगिताको समाचार संकलन गर्न अष्ट्रेलिया पुगेका छन् । तर टिकट खरिद गरेर जान प्रयासमा रहेका आधा भन्दा बढीको भिसा रद्द हुँदा टिकट खरिद गर्ने कतिपय अष्ट्रेलियामा हुने विश्वकप हेर्नबाट बन्चित हुने भएका छन् ।

बिहीबार भिसा प्रक्रियाको विषयलाई लिएर एन्फामा उपाध्यक्ष दिपक खतिवडा र एन्फा कर्मचारी वसन्त रिजालबीच चर्काचर्की नै पर्यो । उपाध्यक्ष खतिवडाले कर्मचारी रिजाललाई विश्वकपको खेल हेर्न जान आफ्नो परिवार (श्रीमती र छोरा) टिकट लिएपछि भिसा प्रक्रिया अघि बढाउन रिजाललाई जिम्मेवारी दिएका थिए । एन्फाबाट टिकट लिने अन्यको भिसा प्रक्रियामा पनि रिजालले नै सहयोग पुर्याएका थिए ।

तर खतिवडाले आफ्नो प्रक्रियाबारे जान्न रिजाललाई विहानदेखि फोन सम्पर्क गर्दा उनले फोन उठाएनन् । दिउँसोसम्म पनि लगातार फोन नउठाएपछि खतिवडा रिसाउँदै एन्फा परिसर आएका थिए । उनी एन्फा प्रवेश गर्दा मैदानमा एन्फा यू-१६ युथ लिगको खेल चलिरहेको थियो । तर उनको गाडीको गतिले एन्फा परिसरमा रहेको धेरैको ध्यानाकर्षण भएको थियो ।

खतिवडा सिधै रिजाल भएको कक्षमा गए । त्यसको केहीबेर अघि फोनमा नै असमझदारी भएपछि खतिवडा एन्फा आएको प्रत्यक्षदर्शीले बताए । त्यसपछि दुई जनाबीच भनाभन नै भयो । हात हालाहालकै स्थिति आएपछि एन्फाका अन्य पदाधिकारीले दुई जनालाई छुट्याउनु परेको थियो । मैदानमा खेल हेर्न बसेका केहि पदाधिकारी र सुरक्षा गार्ड पनि होहल्ला सुनेपछि एन्फा मुख्यालयतर्फ लागेका थिए ।

दुवैलाई फरक कक्षमा लागेपछि स्थिति साम्य भएको बताइएको छ । खतिवडाका अनुसार रिजालले आफ्नो परिवारको भिसा प्रक्रिया गर्ने भनेर जिम्मेवारी लिएपनि त्यसअनुसार काम अघि बढाएका थिएनन् । त्यसैबारे जानकारी लिन फोन सम्पर्क गर्न खोज्दा रिजालले जवाफ नदिएपछि खतिवडा आजित बनेका थिए ।

‘मैले भिसा प्रक्रियाका लागि जिम्मेवारी दिएको थिएँ । उहाँले गर्छु भनेर नै दिएको हो । आज बिहानदेखि फोन सम्पर्क गरें तर उठाउनुभएन । पछि कुरा हुँदा मसँग नराम्रो प्रस्तुत हुनुभयो । मैले एन्फामै गएर कुरा गर्न खोज्दा उल्टै रिसाएर बोल्नुभएको हो । मैले मात्र प्रक्रियाबारे सोध्दा उहाँको प्रस्तुति राम्रो थिएन,’ खतिवडाले भने, मैले डकुमेन्ट मागेको थिए । त्यो पनि दिनुभएन। भोलि फर्काउने खबर पाएको छु।’

यसबारे हाम्रो खेलकुदले कर्मचारी रिजाललाई सम्पर्क गर्न खोज्दा उनले जवाफ दिएनन् । एन्फामा अष्ट्रेलिया जाने प्रयास गरिरहेका कार्यसमिति सदस्यकै पनि भिसा अस्विकार भएको छ । यसबाहेक अन्य टिकट लिने व्यक्तिहरुको पनि भिसा आएको छैन ।

एन्फाले झण्डै डेढ महिनाअघि नै विश्वकपको २ सय ३० टिकट विक्रीका लागि आन्तरिक भागबण्डा गर्ने निर्णय गरेको थियो । एन्फा अध्यक्ष पंकजविक्रम नेम्बाङको अध्यक्षतामा जेठ २० गते बसेको आपतकालीन बैठकले अध्यक्ष, वरिष्ठ उपाध्यक्ष, ४ उपाध्यक्ष, महासचिव, सह महासचिव, प्रवक्ता, कोषाध्यक्ष, सदस्य, जिल्ला, क्लब, मिडिया, प्रायोजक र शुभचिन्तकका लागि टिकटको भागबन्डा गरेको थियो ।

एन्फाका अनुसार अष्ट्रेलियामा हुने खेलको १ सय २५ र न्यूजिल्यान्डमा हुने खेलका लागि १ सय ५ गरि २ सय ३० टिकट विक्रीका लागि उपलब्ध रहेको थियो । एन्फाले पदीय मर्यादाक्रम अनुसार टिकटको भागबण्डा गर्ने क्रममा अध्यक्षलाई अष्ट्रेलियाको ८ र न्यूजिल्यान्डको ७, वरिष्ठ उपाध्यक्षलाई अष्ट्रेलियाको ७ र न्यूजिल्यान्डको ६, चार उपाध्यक्ष र महासचिव हरेकलाई अष्ट्रेलियाको ५ र न्यूजिल्यान्डको ४, केन्द्रिय सदस्य हरेकलाई अष्ट्रेलिया र न्यूजिल्यान्डको समान ३ टिकट भाग लगाएको थियो ।

त्यस्तै एन्फा कोषध्यक्षलाई अष्ट्रेलियाको र न्यूजिल्यान्डको समान १, तीन सहायक महासचिव र प्रवक्ता हरेकलाई अष्ट्रेलियाको १ र न्यूजिल्यान्डको २ टिकट तथा एन्फाका सदस्य जिल्ला, क्लब, मिडिया, प्रायोजक र शुभ चिन्तकलाई अष्ट्रेलियाको ३५ र न्यूजिल्यान्डको १८ टिकट भागमा राखिएको थियो ।

उपाध्यक्ष खतिवडाका अनुसार विश्व कपको फाइनल अवलोकनका एन्फाबाट अध्यक्ष नेम्वाङ, महासचिव किरण राई र आफू जाने तयारी भइरहेको छ।