अकल्यान्ड – सोफिया स्मिथले दुई गोलसँगै एक असिस्ट प्रदान गरेपछि साविक तथा चार पल्टको च्याम्पियन अमेरिकाले नवौं संस्करणको फिफा महिला विश्वकप फुटबल २०२३ मा विजयी सुरुवात गरेको छ ।

अमेरिकाले भियतनाममाथि ३–० को जितसहित विजयी सुरुवात गरेको हो । अमेरिकाको सहज जितमा सोफिया स्मिथले दुई तथा लिन्डसे होरानले एक गोल गरिन् । पहिलो हाफमा दुई तथा दोस्रो हाफमा एक गोल सम्भव भएको थियो ।

न्युजिल्यान्डको अकल्यान्ड स्थित इडेन पार्कमा शनिबार भएको खेलको १४औं मिनेटमा सोफियाको गोलबाट अमेरिकाले सुरुवाती अग्रता लिन सफल भएको थियो । उनले एलेक्स मोर्गानको पासमा गोल गर्न सफल भएकी थिइन् । ४४औं मिनेटमा एलेक्स मोर्गान पेनाल्टीमा चुक्दा अमेरिका अग्रता दोब्बर पार्नबाट चुक्यो ।

पहिलो हाफको इन्ज्युरी समयको थप गरिएको सातौ मिनेटमा सोफियाले व्यक्तिगत र टोलीका लागि दोस्रो गोल गर्दै अमेरिकालाई पहिलो हाफमा २–० को अग्रता दिलाइन् । ७७औं मिनेटमा लिन्डसे होरानले गोल गर्दै अमेरिकालाई ३–० को सहज जित दिलाइन् ।

चार पल्टको च्याम्पियन अमेरिकाले सन् १९९१, १९९९, २०१५ र २०१९ मा उपाधि जितेको छ । अमेरिका सन् २०११ मा उपविजेता समेत हो ।

यस जितसँगै समुह ‘ई’ मा अमेरिकाले एक खेलबाट ३ अंक बटुलेको छ । पराजित भियतनाम अंक विहीन छ । भियतनामले एकपल्ट पनि बलियो अमेरिकाविरुद्ध खतरायुक्त आक्रमण बुन्न सकेन ।