ह्यामिल्टन – एसियाली राष्ट्र जापानले नवौं संस्करणको फिफा महिला विश्वकप फुटबल २०२३ मा सानदार जित दर्ता गर्दै विजयी सुरुवात गरेको छ ।

न्युजिल्यान्डको ह्यामिल्टनस्थित वाइकाटो स्टेडियममा तुलनात्मक रुपमा कमजोर जाम्वियामाथि ५–० को सानदार जित दर्ता गर्दै सुखद् सुरुवात गरेको हो । जापानको फराकिलो जितमा हिनाता मियाजावाले दुई गोल गर्दा मिना तानाका, जुन इन्डो र रिको युकीले समान एक गोल गरिन् ।

जापानले गरेको दुई गोललाई भिएआरले मान्यता दिएन । एक पक्षीय बनेको खेलको २१औं मिनेटमा मिनाले गोल गरेपनि भिएआरबाट उक्त गोलले मान्यता पाएन । ४३औं मिनेटमा हिनाताले गोल गर्दै जापानलाई पहिलो हाफमा १–० को अग्रता दिलाइन् । उनले एओवा फुजिनोको पासमा गोल गर्न सफल भइन् ।

दोस्रो हाफका जापानले थप आक्रामक फुटबल खेल्दै चार गोल गर्न सफल भयो । ४९औं मिनेटमा मिनाले गोल गरेपनि भिएआरमा पुनः अफसाइड ठहरियो । ५१औं मिनेटमा जापानले पेनाल्टीको मौका पाएपनि त्यसलाई भिएआरले खारेज गरिदियो ।

आँफुले गरेको दुई गोलले मान्यता नपाएको मिनाले ५५औं मिनेटमा गोल गर्दै जापानको अग्रता दोब्बर पारिन् । उनले जुन इन्डोको पासमा जाम्वियाको रक्षापङ्ति तोड्न सफल भइन् । ६२औं मिनेटमा मियाजावाले गोल गर्दै जापानलाई खेलमा ३–० ले अघि बढाइन् । उनले मिनाको पासलाई सदुपयोग गरेकी थिइन् ।

७१औं मिनेटमा जुन इन्डोले गोल गरेपछि जापान खेलमा फराकिलो जिततर्फ अग्रसर बन्यो । उनले युई हासेगावाको पासमा गोल गरिन् । इन्ज्युरी समयको थप गरिएको सातौं मिनेटमा जाम्विया १० खेलाडीमा समेटिन पुग्यो ।

गोलरक्षक क्याथेरिन मुसोन्डाले पेनाल्टी बक्समा युकीलाई फउल गरेपछि रेफ्रीले उनलाई रातो कार्ड देखाउँदै मैदान बाहिर पठाउँदा जाम्विया १० खेलाडीमा समेटिन पुग्यो । तर, रिकोको पेनाल्टी वैकल्पिक गोलरक्षक साकालाले बचाएपनि उनी बल प्रहार गर्नुअघि नै अघि बढेको भन्दै रेफ्रीले जापानलाई ‘रि’ पेनाल्टी प्रदान गर्दा यसपटक रिको चुकिनन् ।

यस जितले जापानले एक खेलबाट ३ अंक बटुल्दै शीर्षस्थानमा उक्लिएको छ । समान ३ अंक नै रहेपनि स्पेन गोल अन्तरमा पछि छ । जाम्विया अंकविहीन हुँदै पुछारमा छ ।