ब्रिसवन – नाइजेरियाले फिफा महिला विश्वकप फुटबलमा सह आयोजक अष्ट्रेलियामाथि पूनरागमन जित निकालेको छ ।

नाइजेरियाले एक गोलले पछि परेको स्थिति उल्ट्याएर घरेलु टोली अष्ट्रेलियामाथि ३–२ को सानदार जित निकालेको हो ।नाइजेरियाको पुनरागमन जितमा उचेना कानु, ओसिनाची ओहाले र एसीसाट ओसोएलाले गोल गरिन् । अष्ट्रेसलियाकी इमिली भान एगमोन्ड र एलाना केनिडीले गोल फर्काइन् ।

अष्ट्रेलियाको ब्रिसवनस्थित ब्रिसवन स्टेडियममा बिहीबार भएको प्रतिस्पर्धात्मक बनेको खेलमा गोलको लागि पहिलो हाफको अन्तिम समय नै कुर्नुपरेको थियो ।

पहिलो हाफको इन्ज्युरी समयको थप गरिएको दोस्रो मिनेटमा इमिली भान एगमोन्डले गोल गर्दै घरेलु टोली अष्ट्रेलियालाई १–० को अग्रता दिलाइन् । उनले केइटलिन फुर्डको पासमा गोल गर्न सफल भएकी थिइन् । तर, त्यो अग्रतालाई अष्ट्रेलियाले जोगाउन सकेन ।

पहिलो हाफको इन्ज्युरी समयको थप गरिएको छैटौं मिनेटमा उचेना कानुले गोल गर्दै खेललाई १–१ गोलको बराबरीमा ल्याइन् । ६५औं मिनेटमा ओसिनाची ओहालेले गोल गर्दै नाइजेरियालाई खेलमा २–१ को अग्रता दिलाइन् । उनले एजीवाडेको पासमा गोल गर्न सफल भइन् ।

७२औं मिनेटमा एसीसाट ओसोएलाले गोल गर्दै नाइजेरियालाई ३–१ को सानदार जित दिलाइन् । इन्ज्युरी समयको थप गरिएको १०औं मिनेटमा एलाना केनिडीले गोल गर्दै खेललाई ३–२ को स्थितिमा ल्याएपनि थप गोल गर्न नसक्दा नतिजा पनि सुम्पन पुग्यो ।

यस जितसँगै नाइजेरिया समूह ‘बी’ मा २ खेलबाट ४ अंक जोडेर शीर्षस्थानमा रहेको छ । समान ४ अंक नै भएपनि क्यानडा गोल अन्तरमा दोस्रो स्थानमा छ । पराजित अष्ट्रेलिया २ खेलबाट ३ अंक जोडेर तेस्रो स्थानमा छ । आयरल्यान्ड अंकविहीन हुँदै पुछारमा छ ।