ब्रिसवन – फिफा महिला विश्वकप फुटबलमा फ्रान्सले ब्राजिलमाथि रोमाञ्चक जित निकालेको छ । फ्रान्सले ब्राजिललाई २–१ ले पराजित गरेकाे हाे ।

फ्रान्सको जितमा युजेनी ले सोमर र वेन्डी रेनार्डले गोल गरिन् । ब्राजिलकी डेविन्हाले एक गोल फर्काइन् । ब्रिसवन स्टेडियम अष्ट्रेलियामा शनिबार भएको रोमाञ्चक र प्रतिस्पर्धातमक खेलमा फ्रान्सले खेलको १७औं मिनेटमा नै अग्रता लिन सफल भएको थियो ।

युजेनी ले सोमरले गोल गर्दै फ्रान्सलाई १–० को अग्रता दिलाइन् । उनले काडिडियाटोउ डिएनीको पासमा गोल गर्न सफल भएकी थिइन् ।

उनी फ्रान्सको समेत सर्वाधिक गोलकर्ता हुन् । फ्रान्सेली क्लब लियोनबाट व्यवसायिक खेल खेलिरहेकी ३४ वर्षीय युजेनी ले सोमरले १८१ खेलमा ९० अन्तर्राष्ट्रिय गोल गरेकी छिन् ।

५८औं मिनेटमा डेविन्हाले गोल गर्दै खेललाई १–१ गोलको बराबरीमा ल्याइन् । त्यसपछि ८३ओं मिनेटमा वेन्डी रेनार्डले गोल गर्दै फ्रान्सलाई महत्वपूर्ण जित दिलाइन् । उनले सेल्मा बाचाको पासमा गोल गर्न सफल भएकी थिइन् ।

जारी विश्वकपमा फ्रान्सको यो पहिलो जित तथा ब्राजिलको पहिलो हार हो । फ्रान्स पहिलो खेलमा जमैकासँग गोलरहित बराबरीमा रोकिदा ब्राजिलले पानामामाथि ४–० को फराकिलो जित निकालेको थियो ।

यस जितसँगै अपराजित रहेको फ्रान्स दुई खेलबाट ४ अंक जोडेर समह ‘एफ’ मा शीर्षस्थानमा उक्लिएको छ । पराजित ब्राजिल समान खेलबाटै ३ अंक जोडेर दोस्रो स्थानमा रहेको छ । एक खेल कम खेलेका जमैका र पानामाको समान १ अंक छ ।