डुनेडिन – भियतनाममाथि सानदार जित दर्ता गर्दै नेदरल्यान्ड्स साविक विजेता अमेरिका रहेको समूह ‘ईं’ को विजेता बन्दै प्रि–क्वाटरफाइनलमा प्रवेश गरेको छ ।

डुनेडिन स्टेडियम न्युजिल्यान्डमा मंगलबार भएको खेलमा भियतनामलाई ७–० को भारी गोल अन्तरले हराएर नेदरल्यान्ड्स समूह विजेता बनेर अन्तिम १६ मा स्थान पक्का गर्न सफल भएको हो ।

नेदरल्यान्ड्सको सानदार जितमा इस्मी ब्रुट्स र जिल रुडले समान दुई तथा लिके मार्टिन्स, कट्जा स्नोइस र ड्यानिल भान डि डन्कले समान एक गोल गरिन् । पहिलो हाफमै पाँच गोल गरेको नेदरल्यान्ड्सले दोस्रो हाफमा दुई गोल थप्दै सानदार जित दर्ता गर्यो ।

गोलको वर्षा भएको खेलको आठौं मिनेटमा लेकी मार्टिन्सको गोलबाट नेदरल्यान्ड्सले गोलको खाता खोल्यो । ११औं मिनेटमा कट्जा स्नोइसले गोल गर्दै डच टोलीको अग्रता दोब्बर बनायो । उनले ड्यानिलको पासमा गोल गर्न सफल भएकी थिइन् ।

१८औं मिनेटमा इस्मीले गोल गरेपछि नेदरल्यान्ड्स खेलमा ३–० ले अघि बढ्यो । उनले लेकीको पासमा गोल गर्न सफल भएकी थिइन् । २३औं मिनेटमा जिल रुडले गोल गरेपछि नेदरल्यान्ड्सले २३ मिनेटमै ४–० को आरामदायी अग्रता लिन सफल भयो ।

४५औं मिनेटमा ड्यानिलले गोल गरेपछि नेदरल्यान्ड्स पहिलो हाफमा ५–० को आरामदायी स्थितिमा अघि बढ्यो । ५७औं मिनेटमा इस्मीले व्यक्तिगत दोस्रो तथा टोलीका लागि छैटौं गोल गरेपछि नेदरल्यान्ड्स खेलमा ६–० ले अघि बढ्यो ।

६७औं मिनेटमा लेकीले गोल गरेपनि भिएआरमा अफसाइड ठहरिदा गोलले मान्यता पाएन । ८३औं मिनेटमा जिल रुडले व्यक्तिगत दोस्रो तथा टोलीका लागि सातौं गोल गर्दै सानदार जित दिलाइन् ।

यस जितसँगै अपराजित रहेको नेदरल्यान्ड्सले समूह ‘ई’ मा ३ खेलबाट ७ अंक जोडेर शीर्षस्थान कब्जा गर्यो । समान खेलबाटै अमेरिकाले ५, पोर्चुगलले ४ तथा भियतनाम अंकविहीन बन्यो ।