ह्यामिल्टन – उपाधि दावेदार स्वीडेन समूह विजेता बन्दै फिफा महिला विश्वकप फुटबलको नकआउट चरणमा प्रवेश गर्दा अर्जेन्टिना समूह चरणबाटै बाहिरिएको छ ।

अर्जेन्टिनालाई २–० ले पराजित गर्दै स्वीडेन समूह ‘जी’ को विजेता बन्दै प्रि–क्वाटरफाइनलमा प्रवेश गर्दा अर्जेन्टिना पुछारमा रहँदै समूह चरणबाटै बाहिरिएको हो ।

न्युजिल्यान्डको ह्यामिल्टनस्थित वाइकाटो स्टेडियममा बुधबार भएको खेलमा स्वीडेनको जितमा रेविका ब्लोमभिस्ट र एलिन रुवेन्सनले गोल गरिन् । खेलको सुरुवात देखि नै बल पोसेसन राखेको स्वीडेनले गोलको लागि दोस्रो हाफ नै कुर्नुपरेको थियो ।

६६औं मिनेटमा रेविकाले गोल गर्दै स्वीडेनलाई १–० को अग्रता दिलाइन् । उनले सोफिया जाकोब्सनको पासमा गोल गर्न सफल भएकी थिइन् । इन्ज्युरी समयको थप गरिएको पहिलो मिनेटमा एलिन रुवेन्सनले पेनाल्टीमा गोल गर्दै स्वीडेनलाई २–० को सहज जित दिलाइन् ।

ग्राविएला चाभेजले पेनाल्टी बक्समा रेविका ब्लोमभिस्टमाथि फउल गरेपछि रेफ्रीले स्वीडेनलाई पेनाल्टी प्रदान गर्दा उनी चुकिनन् । अर्जेन्टिनाले भने कुनै पनि समय गतिलो आक्रमण बुन्न सकेन ।

यस जितसँगै शत प्रतिशत जित निकालेको स्वीडेनले ३ खेलबाट ९ अंक बटुल्यो । पराजित अर्जेन्टिना १ अंक जोडेर पुछारमा रहँदै बाहिरिएको छ ।