काठमाडौं (हाम्रो खेलकुद)– सहिद स्मारकको तीन तहका क्लबहरुले आफूले पाउनु पर्ने रकम छिटो उपलब्ध गराउन अखिल नेपाल फुटबल संघ (एन्फा) को ध्यानाकर्षण गराएका छन् ।

सहिद स्मारक ए,बी र सी डिभिजनका २६ क्लबले बिहीबार संयुक्त रुपमा एन्फा महासचिव किरण राईलाई ध्यानाकर्षण पत्र बुझाएका हुन् । पत्र बुझाउने टोलीमा एन्फाका पूर्व अध्यक्ष कर्मा छिरिङ शेर्पा, महासचिव इन्द्रमान तुलाधरमा थिए । क्लबहरुका अनुसार उनीहरुले २०७७/७८ तथा २०७९/८० को लिगको तयारी रकम पाउन बाँकी छ ।

‘फुटबलको मेरुदण्डको रूपमा रहेको लिगलाई आर्थिक प्राविधिक, भौतिक र व्यवस्थित रुपमा विकास गरी आर्थिक पारदर्शिता गरी आर्थिक स्रोतको ग्यारेन्टी गरेर मात्रै खेल सञ्चालन गर्नुपर्नेमा आश्वासनको भरमा खेल सञ्चालन गरेर खेल सम्पन्न भएको महिनौं बित्दा पनि पुरानो र नयाँ प्रतियोगिताको निम्नानुसार रकमहरु हालसम्म उपलब्ध भएको छैन,’ ध्यानाकर्षण पत्रमा भनिएको छ ।

क्लबहरुको अनुसार एन्फाले ‘ए’ डिभिजन क्लबहरुलाई २०७७ /७८ को लिगमा ९७ लाख ५० हजार तथा २०७९/८० को लिगमा २ करोड ४५ लाख गरी कुल ३ करोड ४२ लाख ५० हजार रुपैयाँ दिन बाँकी छ । त्यस्तै ‘बी’ डिभिजन लिगका क्लबहरुलाई पनि एन्फाले २०७७/७८ को लिगमा ९१ लाख तथा २०७९/८० को लिगमा ३५ लाख गरि १ करोड २६ लाख रुपैयाँ पाउन बाँकी छ । एन्फाबाट ‘सि’ डिभिजन क्लबहरुले पनि २०७७/७८ लिगको ४० लाख ५० हजार पाउन बाँकी छ ।

दुईवर्ष अघिको लिगको मनाङ मस्र्याङ्दी क्लबबाहेकका क्लबबले ७ लाख ५० हजार तथा पछिल्लो लिगको सबै क्लबको १७ लाख ५० हजार तयारी खर्च एन्फाबाट पाउन बाँकी छ । त्यस्तै ‘बी’ डिभजनका प्रत्येक क्लबले ६ लाख ५० हजार र ‘सि’ डिभिजनमा क्लबले ४ लाख ५० हजार पाउन बाँकी रहेको बताइएको छ ।