एजेन्सी – साउदी क्लब अल इतिहाद अरब क्लब कप २०२३ को क्वाटरफाइनलमा अल हिलालसँग पराजित हुँदै बाहिरिएको छ ।

शनिबार भएको खेलमा अल हिलालले ३-१ को जित दर्ता गर्दै सेमिफाइनलमा स्थान बनाएको हो । अल इतिहादका लागि फ्रान्सेली फरवार्ड करीम बेन्जेमाले पेनाल्टी चुकाए ।

अल हिलालले खेलको १४ औं मिनेटमा सर्गे मिलिन्कोभिच साभिचको गोलमा अग्रता लिएको थियो । उनले पोर्चुगिज मिडफिल्डर रुबेन नेभेसले दिएको बलमा हेडरमार्फत गोल गरे । इन्ज्युरी समयको पहिलो मिनेटमा साउदी फरवार्ड सालेम अल दावसारीले पेनाल्टीमा गोल गर्दै अग्रता दोब्बर पारे ।

५६ औं मिनेटमा अल इतिहादले गोल गर्दै खेलमा फर्कने संकेत दियो । इगोर कोरोनादोको पासमा ब्राजिलियन फरवार्ड रोमारिन्होले गोल गर्दै २-१ को स्थिति बनाए ।

तर ७० औं मिनेटमा अल हिलालले पुन: २ गोलको अग्रता लियो । यासिर अल सहरानीले दिएको बललाई माल्कमले हेडरमार्फत गोल गरे । ७९ औं मिनेटमा करीम बेन्जेमाले पेनाल्टीको सदुपयोग गर्न नसक्दा अल इतिहाद खेलमा फर्कन सकेन ।

शनिबार नै भएको अर्को क्वाटरफाइनलमा कतारको अल साद इराकको अल शोर्तासँग पराजित भयो । अल सादका अक्रम अफिफले दुई गोल गरेपनि टोली ४-२ ले पराजित भएको हो ।

आज हुने क्वाटरफाइनलमा साउदीको अल शबाबले यूएईको अल वाह्दाको सामना गर्नेछ । यो खेल रातको ११:४५ बजे हुनेछ ।

त्यस्तै क्रिस्टियानो रोनाल्डोको कप्तानीमा रहेको अल नासर र मोरक्कोको राजा क्लासाबान्काले प्रतिस्पर्धा गर्नेछन् । यो खेल नेपाली समयअनुसार साँझ ८:४५ बजे हुनेछ ।