एजेन्सी – कप्तान ह्यारी केनले ४ गोल गरेपछि टोटेनहम हट्सपरले प्रि सिजनको मैत्रीपूर्ण खेलमा शाख्तर डोनेस्कलाई फराकिलो अन्तरले पराजित गरेको छ ।

लन्डनस्थित घरेलु मैदानमा टोटेनहमले ५-१ को सहज जित दर्ता गर्यो । पहिलो हाफमा १-१ को बराबरी भएपनि दोस्रो हाफमा टोटेनहमले उत्कृष्ट प्रदर्शन गर्यो । केनले खेलमा ८० मिनेट खेल्दै ४ गोल गरेका थिए ।

खेलको ३८ औं मिनेटमा केनले घरेलु टोलीलाई अग्रता दिलाए । पेनाल्टी क्षेत्रभित्र जेम्स म्याडीसनलाई लडाएपछि प्राप्त पेनाल्टीमा केनले गोल गरे । ४५ औं मिनेटमा केभिन केलसीले हेडरमार्फत गोल गर्दै खेल बराबरीमा ल्याए ।

५० औं मिनेटमा केनले टोटेनहमको अग्रता पुन: स्थापना गरे । उनले म्याडीसनको क्रसमा हेडरमार्फत गोल गरेका थिए । त्यसको ५ मिनेटपछि नै केनले पेनाल्टी क्षेत्र भित्रबाट सुन्दर फिनिसका साथ आफ्नो ह्याट्रिक पूरा गरे ।

७९ औं मिनेटमा केनले व्यक्तिगत चौथो गोल गरे । गोलरक्षक प्यातोभले बचाएपछि फर्केको बललाई केनले सहजै गोल गरे । इन्ज्युरी समयको चौथो मिनेटमा युवा फरवार्ड डेन स्कारलेटले गोल गरे । केनको स्थानमा मैदान प्रवेश गरेका उनले पेनाल्टी क्षेत्र भित्रबाट सुन्दर फिनिस गरेका थिए ।

टोटेनहमले अब प्रि सिजनमा बार्सिलोनासँग खेल्नेछ । जोआन गाम्पर ट्रफीका लागि खेल मंगलबार हुनेछ ।