मेलवर्न – कोलम्विया अष्ट्रेलिया र न्युजिल्यान्डमा जारी फिफा महिला विश्वकप फुटबल २०२३ को क्वाटरफाइनलमा प्रवेश गरेको छ ।

मंगलबार भएको प्रि–क्वाटरफाइनलमा जमैकालाई १–० ले पराजित गर्दै अन्तिमा आठमा स्थान पक्का गरेको हो । कोलम्वियाको जितमा दोस्रो हाफमा क्याटलिना उस्मीले गरेको गोल नै निर्णायक बन्यो । उनले ५१औं मिनेटमा गोल गर्न सफल भएकी थिइन् ।

मेलवर्न रेकटेङगुलर स्टेडियम मेलवर्न अष्ट्रेलिया प्रतिस्पर्धात्मक र रोमाञ्चक बनेको खेलमा दुवै टोलीले गोलका केही अवसर सिर्जना गरेपनि सदुपयोग गर्न सकेन ।

तर, ५१औं मिनेटमा क्याटलिना उस्मीले गोल गर्दै कोलम्वियालाई १–० को अग्रता दिलाइन् । उनले एना गुजमनको पासमा गोल गर्न सफल भएकी थिइन् । त्यही गोल नै कोलम्वियाको जितमा निर्णायक बन्यो ।

अब कोलम्वियाले क्वाटरफाइनलमा इंग्ल्यान्डको सामना गर्नेछ । इंग्ल्यान्डले सोमबार नाइजेरियालाई टाइब्रेकरमा ४–२ ले पराजित गर्दै अन्तिम आठमा स्थानमा स्थान बनाइसकेको छ । यि दुई टोलीको खेल १२ अगस्टमा हुनेछ । आज नै अन्तिम प्रि–क्वाटरफाइनलमा फ्रान्स र मोरोक्कोबीच केहीवेरमा प्रतिस्पर्धा हुँदैछ ।

न्युजिल्यान्ड र अष्ट्रेलियाको विभिन्न ९ स्थानमा आगामी २० अगस्टसम्म चल्ने महिला विश्वकपमा ३२ टोलीको सहभागिता रहेको छ । सहभागी टोलीलाई ८ समूहमा विभाजन गरिएको छ । हरेक समूहका शीर्ष दुई टोली प्रि–क्वाटरफाइनलमा पुग्नेछ । फाइनल सिड्नीस्थित एकर स्टेडियम (स्टेडियम अष्ट्रेलिया) मा हुनेछ ।