काठमाडौं (हाम्रो खेलकुद) – त्रिभुवन आर्मी फुटबल क्लबले भारतको प्रतिष्ठित डुरान्ड कप अन्तर्गत समूह ई को खेलमा आज दिल्ली फुटबल क्लबको सामना गर्दैछ । खेल नेपाली समयअनुसार दिउँसो २:४५ बजे हुनेछ ।

आर्मीले प्रतियोगितामा पहिलो खेल खेल्दा दिल्लीले भने दोस्रो खेल खेल्न लागेको हो । दिल्लीले यसअघि आइतबार भएको खेलमा हैदरावादसँग १-१ को बराबरी खेलेको थियो । दिल्लीले सुरुवात अग्रता लिएपनि दोस्रो हाफमा गोल खाएको थियो ।

आर्मीले अनुभवी फरवार्ड भरत खवास र राष्ट्रिय टोलीको क्याम्पमा परेका युवा फरवार्ड जिलेस्पी जंग कार्कीबिना नै भारत यात्रा गरेको छ । प्रशिक्षक मेघराज केसीले आर्मी फर्किएसँगै नयाँ खेलाडीलाई प्राथमिकतामा राखेका छन् ।

आर्मीले दिल्लीविरुद्ध खेलेपछि अर्को सोमबार चेन्नईयनसँग खेल्नेछ । अन्तिम खेल २२ अगस्टमा आइएसएल टोली हैदरावादसँग हुनेछ । हरेक समूहबाट समूह विजेताले नकआउट चरणमा स्थान बनाउनेछन् । ६ समूह मध्यबाट उत्कृष्ट दुई दोस्रो हुने टोली क्वाटरफाइनलमा प्रवेश गर्नेछन् ।

प्रतियोगिताको सबै खेलको प्रत्यक्ष प्रसारण सोनी टेन २ र सोनी लिभले गरेको छ ।

आर्मीको टोली :

विकेश कुथु, सम्मित श्रेष्ठ, विप्लव गुरुङ, नविन परियार, नवयुग श्रेष्ठ, टेकबहुदर बुढाथोकी, युद्ध शाही, टंक बस्नेत, जितेन्द्र कार्की, पदम तामाङ, विमल पाण्डे, सन्तोष केसी, भरत चौधरी, भुपेन्द्र रायमाझी, आशिष शाक्य, रिपू भुलान, दिसान्त राई, वसन्त जिम्बा, वसन्त तामाङ, सिद्धान्त चौधरी, सुदिल राई, सुरोज बस्नेत, सुशान्त चौधरी, फत्तेमान घले, कमल थापा, निरज शाह, किरण खड्का, आशिक चौधरी, सेसेहाङ आङदेम्बे, दिनेश हेन्जन