काठमाडौं (हाम्रो खेलकुद) – विभागीय टोली त्रिभुवन आर्मी क्लबले भारतको प्रतिष्ठित डुरान्ड कपमा दिल्ली फुटबल क्लबविरुद्ध जितबाट बन्चित भएको छ ।

बुधबार आसामको कोक्राझारस्थित साइ मैदानमा ८८ औं मिनेटमा गोल खाँदा आर्मी र दिल्लीको खेल १-१ को बराबरीमा टुंगियो। पहिलो हाफमा दिनेश हेन्जनले गरेको गोलमा आर्मी अघि बढेको थियो ।

दोस्रो हाफमा दिल्लीले पुनरागमनको प्रयास गर्दा गोलरक्षक विकेश कुथुलाई बिट गर्न निकै प्रयास गरेको थियो । अन्तिम ३ मिनेट सम्हालिन नसक्दा आर्मी अंक बाँड्न बाध्य भयो ।

पहिलो हाफको ३९ औं मिनेटमा दिल्लीका गोलरक्षकले गरेको गल्तिको फाइदा उठाउँदै आर्मीले अग्रता लिएको थियो । नवयुग श्रेष्ठको क्रस गोलरक्षक पवन कुमारले फुस्काएपछि कमल थापाले दिएको पास दिनेशले गोलमा परिणत गरेका थिए ।

८८ औं मिनेटमा दिल्लीले बराबरी गोल फर्काएको थियो । सुरुवाती प्रहार क्रसबारमा लगेर फर्केपनि रिबाउन्डमा गिरीक घोश्लाले हेडरमार्फत गोल गर्दा दिल्ली खेलमा फर्किएको थियो ।

दिल्लीको यो लगातार दोस्रो बराबरी हो । यसअघि पहिलो खेलमा आइएसएल टोली हैदरावाद र दिल्लीको खेल १-१ कै बराबरीमा सकिएको थियो । समूहमा अर्क खेल भोली चेन्नईयन र हैदरावाद बीच हुनेछ ।

आर्मीले अब दोस्रो खेलमा सोमबार चेन्नईयनसँग खेल्नेछ । अन्तिम खेल २२ अगस्टमा आइएसएल टोली हैदरावादसँग हुनेछ । हरेक समूहबाट समूह विजेताले नकआउट चरणमा स्थान बनाउनेछन् । ६ समूह मध्यबाट उत्कृष्ट दुई दोस्रो हुने टोली क्वाटरफाइनलमा प्रवेश गर्नेछन् ।