एजेन्सी – स्पेनिस क्लब रियल म्याड्रिडका पहिलो रोजाइका गोलरक्षक थिबाउट कोर्टुवाले प्रशिक्षणका क्रममा गम्भीर चोट बोकेका छन् ।

विहीबार प्रशिक्षणका क्रममा बायाँ घुँडामा चोट बोकेपछि कोर्टुवा आँशु झर्दै मैदान छाडेका थिए । उनलाई तुरुन्त थप परिक्षणका लागि लागिएको थियो । प्रारम्भिक जाँचले नै कोर्टुवाको एन्टेरिएर क्रुसिएट लिगामेन्ट (एसिएल) मा चोट लागेको बुझिएको छ ।

आइतबार ला लिगा अन्तर्गत एथ्लेटिक बिल्बाओविरुद्ध खेलका लागि तयारी गर्ने क्रममा कोर्टुवाले चोट बोक्न पुगेका हुन् । एसिएल चोट फुटबलमा सबैभन्दा गम्भीर चोट मध्यम गनिन्छ । यो चोटबाट पुनरागमन गर्न शल्यक्रियापछि ६ देखि ९ महिना लाग्छ ।

यसै चोटका कारण कतिपय खेलाडीको करिअर नै पूर्णविराम समेत लागेको छ । अझ गोलरक्षकको हकमा यो चोट निकै दुर्लभ र पुर्ण रुपमा ठिक भएर मैदान फर्कन धेरै समय लाग्ने गर्दछ ।

कोर्टुवाले रियल म्याड्रिडमा पहिलो रोजाइका रुपमा खेल्दै आएको लामो समय भइसकेको छ । उनको चोटसँगै अब क्लबसँग आन्द्रिए लुनिन विकल्पका रुपमा रहेका छन् । क्लबले ट्रान्सफर बजारमा विकल्पको खोजी गर्ने सम्भावना बलियो छ ।

सन् २०१८ मा चेल्सीबाट आएका कोर्टुवाले रियलबाट २ सय ३० पटक खेल्दै दुई पटक स्पेनिस ला लिगा र एक पटक च्याम्पियन्स लिग जितिसकेका छन् ।