एजेन्सी – फरवार्ड ह्यारी केनका लागि बुन्डेसलिगा टोली बायर्न म्युनिखले गरेको ट्रान्सफर प्रस्ताव टोटेनहम हट्सपरले स्वीकारेसँगै ट्रान्सफर सम्पन्न हुने सम्भावना बलियो भएको छ ।

युरोपेली सन्चारमाध्यमका अनुसार बायर्नले १ सय मिलियन युरोमा केनलाई भित्राउने टोटेनहमसँग सहमति भएको बताइएको छ । इंग्ल्यान्डका कप्तान समेत रहेका केन १ सय मिलियनमा आबद्ध भए भने बायर्नको इतिहासमा सबैभन्दा महंगा खेलाडी हुनेछन् ।

तर यसअघि नै बायर्न र केनबीच मौखिक सहमति भएको चर्चा चलेपनि अहिले भने जर्मन क्लब केनको निर्णयको प्रतीक्षामा रहेको छ । दुई क्लबबीच सहमति भएपनि केनले अन्तिम निर्णय लिएपछि मात्र ट्रान्सफर सम्पन्न हुनेछ ।

ट्रान्सफर विन्डोको सुरुवातमा बायर्नका पदाधिकारीले च्याम्पियन्स लिग जित्ने अपेक्षासहित केनलाई अनुबन्ध गर्ने बताएका थिए । केन आफैं पनि माथिल्लो स्तरको प्रदर्शनका साथ उपाधि जित्नका लागि प्रिमियर लिग र टोटनहम छोड्न तयार भएको अनुमान गरिएको थियो ।

टोटनहमसँगको केनको सम्झौता सन् २०२४ जुनसम्म रहेको छ । त्यसैले पनि टोटेनहमले नयाँ सम्झौता नगरे केनलाई सित्तैमा अन्य क्लब जान नदिन बायर्नको प्रस्ताव स्वीकार गरेको हो ।

केनले टोटेनहम छोड्ने निर्णय गरे उनी यो सिजन बायर्न पुग्ने चौथो खेलाडी हुनेछन् । दक्षिण कोरियाली डिफेन्डर किम मिन जे ५० मिलियन युरो तथा मिडफिल्डर कोनराड लेइमर र डिफेन्डर राफेल गुरिरो फ्रि एजेन्टमा बार्यनमा आबद्ध भएका हुन् ।