एजेन्सी – न्युकासल युनाइटेडले इंग्लिस प्रिमियर लिगको नयाँ सिजनमा सानदार सुरुवात गरेको छ । घरेलु मैदानमा एस्टन भिल्लालाई ५-१ ले पराजित गर्दै न्युकासलले पहिलो खेलमा फराकिलो जित दर्ता गर्यो ।

न्युकासलको जितमा एलेक्जेन्डर इसाकले २ तथा सान्ड्रो टोनाली, क्यालम विल्सन र हार्भी बार्न्सले १-१ गोल गरे । भिल्लाका लागि मौसा डियाबीले बराबरी गोल फर्काएपनि खेलमा नतिजा निकाल्न पर्याप्त रहेन । न्युकासलले दोस्रो हाफमै ३ गोल थपेको थियो ।

खेलको छैटौं मिनेटमा नै घरेलु टोलीले डेब्यु गरिरहेका इटालियन मिडफिल्डर टोनालीको गोलमा अग्रता लियो । बायाँ विंगबाट एन्थोनी गोर्डनले दिएको क्रसलाई टोनालीले ६ यार्ड बक्सभित्र आएर फिनिस गरे ।

११ औं मिनेटमा भिल्लाका लागि पनि डेब्यु गरिरहेका डियाबीले बराबरी गोल गरे । क्रसमा आएको बललाई वाटकिन्सले ६ यार्ड बक्सनजिक फ्लिक गरेपछि अनमार्क रहेका डियाबीले बललाई पोस्टको दिशा दिए ।

त्यसको ५ मिनेटपछि नै न्युकासलले इसाकको गोलमा अग्रता पुन: स्थापना गर्यो । लामो फ्रिकिकमा आएको बललाई स्वेन बोटम्यानले इसाकको दिशामा पठाएपछि स्विडिस फरवार्डले कुनै गल्ती गरेनन् ।

५८ औं मिनेटमा इसाकले व्यक्तिगत दोस्रो गोल गरे । पेनाल्टी क्षेत्रभित्र भिल्लाका डिफेन्डरले गरेको गल्तीमा इसाकले गोल गरे । एज्री कोन्साबाट खोसेको बललाई इसाकले गोलरक्षक एमिलियानो मार्टिनेजको माथिबाट पोस्टतर्फ पठाएका थिए ।

७७ औं मिनेटमा हार्भी बार्न्सको पासमा क्यालम विल्सनले गोल गर्दै न्युकासललाई ४-१ ले अघि बढाए । इन्ज्युरी समयमा न्युकासलबाट डेब्यु गरिरहेका बार्न्स आफैंले गोल थपे । उनले जेकब मर्फीले मिडफिल्डबाट दिएको पासमा गोलरक्षकलाई बिट गरेका थिए ।

प्रिमियर लिग अन्तर्गत नै शनिबार आर्सनलले पनि विजयी सुरुवात गर्यो । एडी एनकेटिया र बुकायो साकाको गोलमा आर्सनलले नटिङ्घमलाई २-१ ले हरायो । ताइवो अवोनियीले पाहुना टोलीका लागि एकमात्र गोल गरे ।

ब्राइटनले नवप्रवेशी ल्युटनमाथि ४-१ को जित दर्ता गर्दा फुलहमले एभर्टनको मैदानमा १-० को जित हासिल गर्यो । क्रिस्टल प्यालेस पनि सेफिल्ड युनाइटेडको मैदानमा १-० ले विजयी भयो । बर्नमाउथ र वेस्ट ह्यामको खेल १-१ को बराबरीमा सकियो ।