एजेन्सी – ब्राजिलियन फरवार्ड नेयमार साउदी प्रो लिग खेल्ने भएका छन् । पेरिस सेन्ट जर्मेन (पिएसजी) र साउदी प्रो लिग टोली अल हिलालबीच नेयमारलाई लिएर सम्झौता भएको छ ।

९० मिलियन युरो र थप बोनससहित नेयमारलाई भित्राउन अल हिलाल तयार भएको हो । ३१ वर्षे नेयमारसँगको सम्झौता स्वास्थ्य परिक्षण र कागजी प्रक्रियापछि पूरा हुने बताएको छ ।

नेयमार सन् २०१७ मा बार्सिलोनाबाट विश्व कीर्तिमान रकम २ सय २२ मिलियन युरोमा पिएसजी पुगेका थिए । शनिबबार लोरियन्टसँग लिग वानको टोलीको पहिलो खेलमा नेयमार पिएसजीमा समावेश थिएनन् । टोलीका नयाँ प्रशिक्षक लुइस इन्रिकेले पनि नयाँ सिजनका लागि नेयमार आफ्नो योजनामा नरहेको बताएका थिए ।

नेयमारले अल हिलालबाट बार्षिक १ सय ५० मिलयन युरो प्राप्त गर्नेछन् । जुन रकम पिएसजीको भन्दा छ दोब्बर रहेको छ । पिएसजीमा १ सय ७३ खेल खेल्ने क्रममा उनले १३ उपाधि जितेका थिए । जस उनी ५ पटक लिग वान च्याम्पियन बनेका थिए । सन् २०२० मा नेयमार सम्मिलित पिएसजी च्याम्पियन्स लिगको फाइनलमा पुगेको थियो ।

पिएसजीमा रहँदा उनी अनेकौं पटक चोटग्रस्त भएका थिए । उनको गत मार्च शल्यक्रिया भएको थियो भने त्यसपछि उनी सिजनभर मैदान बाहिर रहेका थिए । जुलाईबाट उनी अभ्यासमा फर्केका थिए । सन् २०२२ को विश्व कपमा पनि पहिलो खेलमा चोट ग्रस्त भएपछि उनले दुई खेल गुमाएका थिए ।