अल नासरको लगातार हार

एजेन्सी – साउदी क्लब अल नासरले रोशन प्रिमियर लिगमा लगातार दोस्रो हार बेहोरेको छ ।

शुक्रबार भएको लिगको दोस्रो खेलमा अल नासरले अल ताउनसँग २-० को हार बेहोरेको हो । आक्रमणमा कप्तान क्रिस्टियानो रोनाल्डो र साडियो माने उत्रिएपनि अल नासरले लिगको दोस्रो खेलमा गोल गर्न सकेन ।

गत साता अरब क्लब च्याम्पियन्स कपको उपाधि जितेको अल नासर पहिलो खेलमा पनि पराजित भएको थियो । अल इतिफाकविरुद्ध साडियो माने ले अग्रता दिलाएपनि क्लब २-१ ले हार्न पुगेको थियो ।

शुक्रबारको खेलका सबै मुख्य खेलाडी ९० मिनेट मैदानमा रहेपनि अल नासरले जित हासिल गर्न सकेन । अल ताउनका लागि लिआन्दर तावाम्बाले २० मिनेटमा अग्रता दिलाए । इन्ज्युरी समयमा सालेह बाहुस्यानले गोल गर्दै पाहुना टोलीको जित पक्का गरे ।

अल‌ नासरले अब मंगलबार एएफसी च्याम्पियन्स लिगको प्लेअफमा यूएईको शबाब अल अह्लीको सामना गर्दैछ । उक्त खेल जित्ने टोली च्याम्पियन्स लिगको समूह चरणमा प्रवेश गर्नेछ भने हार्ने टोलीले दोस्रो श्रेणीको एएफसी कप खेल्नेछ ।