एजेन्सी – इंग्लिस प्रिमियर लिग अन्तर्गत दुई लन्डन क्लबबीचको खेलमा वेस्ट ह्याम युनाइटेडले चेल्सीलाई हराएको छ ।

घरेलु मैदान ओलम्पिक रंगशालामा १० खेलाडीमा समेटिएको वेस्ट ह्यामले चेल्सीलाई ३-१ ले पराजित गरेको हो । वेस्ट ह्यामको जितमा नाएफ अगुएर्ड, मिकाएल एन्टोनियो र लुकास पाक्वेटाले १-१ गोल गरे । चेल्सीका कार्ने चुक्वुएमेकाले गरेको बराबरी गोल अंक दिलाउन पर्याप्त रहेन ।

खेलको सातौं मिनेटमा नै घरेलु टोलीले अगुएर्डको गोलमा अग्रता लिएको थियो । यसै सिजन क्लबमा आएका जेम्स वार्ड प्राउजको कर्नरमा अगुएर्डले हेडरमार्फत गोल गरेका थिए ।

२८ औं मिनेटमा चेल्सीका लागि चुक्वुएमकाले बराबरी गोल फर्काए । पेनाल्टी क्षेत्रभित्र उनले दुई डिफेन्डरलाई बिट गरेपछिको शक्तिशाली प्रहारलाई गोलरक्षक अल्फोन्स आरिओलाले बचाउन सकेनन् ।

४३ औं मिनेटमा चेल्सीले पेनाल्टीबाट अग्रता लिने अवसर पायो । पेनाल्टी क्षेत्रको ठिक भित्र रहिम स्टर्लिङलाई लडाएपछि रेफ्रीले पेनाल्टी दिएका थिए । अर्जेन्टिनी मिडफिल्डर एन्जो फर्नान्डेजको पेनाल्टी गोलरक्षक आरिओलाले विफल पार्दै खेल बराबरीमा राखे ।

दोस्रो हाफको ५३ औं मिनेटमा वेस्ट ह्यामले पुन: अग्रता लियो । चेल्सीले मिडफिल्डमा बल गुमाएपछि जेम्स वार्ड प्राउजले दिएको पासलाई एन्टोनियोले गोलमा परिणत गरे ।

६७ औं मिनेटमा वेस्ट ह्याम १० खेलाडीमा सिमित भयो । निकोलस ज्याकसनमाथि फल गरेपछि रेफ्रीले अगुएर्डलाई दोस्रो पहेंलो कार्ड देखाएका थिए ।

खेलको अन्तिम समयमा वेस्ट ह्यामले पेनाल्टीको अवसर पायो । चेल्सीका लागि डेब्यु गरिरहेका मोजेस काइसेडोले पेनाल्टी क्षेत्रभित्र फल गरेपछि रेफ्रीले पेनाल्टी दिए । पाक्वेटाले उक्त पेनाल्टीमा गोल गर्दै ३-१ को जित पक्का गरे ।

चेल्सी पहिलो खेलमा लिभरपुलसँग १-१ को बराबरीमा रोकिएको थियो । वेस्ट ह्यामले पनि बर्नमाउथसँग समान अन्तरको नतिजाले अंक बाँडेको थियो ।