काठमाडौं (हाम्रो खेलकुद) – मछिन्द्र फुटबल क्लबको एएफसी कप खेल्ने यात्रामा बाधक बनेको भारतीय क्लब मोहन बगान सुपर जायन्टले एएफसी कपको समूह चरणको यात्रा तय गरेको छ ।

मंगलबार कोलकताको साल्ट लेक स्टेडियममा भएको प्लेअफ फाइनलमा बंगलादेशको अवाहानी लिमिटेड ढाकालाई ३-१ ले हराउँदै मोहन बगानले समूह चरणमा आफ्नो स्थान पक्का गरेको हो । यसअघि माल्दिभ्सको क्लब इगल्सलाई हराउँदै प्लेअफको फाइनल पुगेको अवाहानीले खेलमा अग्रता लिएको थियो ।

खेलको १७ औं मिनेटमा कोर्नेलुइस स्टेवार्टले गोल गर्दै बंगलादेशी टिमलाई अग्रता दिलाएका थिए । तर त्यो अग्रता धेरै बेर टिक्न सकेन । गोल खाएपछि सुधारिएको प्रदर्शन गरेको मोहन बगानले ३७औं मिनेटमा अष्ट्रेलियन फरवार्ड जेसन कमिंग्सको गोलबाट खेलमा फर्कियो । कमिंग्सले पेनाल्टी मार्फत गोल गर्दै खेल बराबरीमा ल्याएका थिए ।

दोस्रो हाफको खेलमा पनि मोहन बगानकै पकड रहिरह्यो । ५९औं मिनेटमा मिलाद शेखी सोलेमानिले आत्मघाती गोल गरेपछि मोहन बगान खेलमा अघि बढेको थियो । अवाहानीले त्यसको एक मिनेट पछि नै अर्को गोल खाँदा पुनरागमन गर्न सकेन । भारतीय टोलीका लागि अर्मान्डो साडिकुले गोल थप्दै जित सुनिश्चित गरे ।

गत वर्षको एएफसी कप छनोटको प्लेअफमा पनि मोहन बगानले अवाहानीलाई ३-१ को अन्तरले नै पराजित गर्दै समूह चरणमा पुगेको थियो । सोही परिणाम दोहोर्याएको मोहन बगानले अब दक्षिण एसिया क्षेत्रबाट भारतकै ओडिशा एफसी, बंगलादेशको बसुन्धरा किंग्स र माल्दिभ्सको माजिया स्पोर्ट्ससँग प्रतिस्पर्धा गर्नेछ ।