काठमाडौं (हाम्रो खेलकुद) – नेपाली राष्ट्रिय फुटबल टोलीकी फरवार्ड सावित्रा भण्डारी सम्मिलित हापोएल रानाना महिला फुटबल क्लब इजरायलको एथेना कपको फाइनल पुग्नबाट बन्चित भएको छ ।

विहीबार राती भएको खेलमा लिग च्याम्पियन किर्यात गातसँग पराजित भएपछि रानानाको यात्रा सेमिफाइनलमा रोकिएको हो । युरोपेली च्याम्पियन्स लिगको छनोट खेल्ने तयारीमा रहेको किर्यात गातले ३-० को जित दर्ता गर्दै फाइनलमा स्थान पक्का गर्यो ।

पछिल्लो खेलमा फराकिलो हार बेहोरेको रानानाले लिग च्याम्पियनविरुद्ध भने राम्रो प्रदर्शन गर्यो । नेपाली फरवार्ड साम्बाले बलियो प्रतिद्वन्द्वीविरुद्ध केहि अवसर पाएपनि विपक्षी गोलरक्षक बाधक बन्दा गोल गर्न सकिनन् ।

यसअघि रानानाको लागि डेब्यु खेलमा सावित्राले १ गोल र १ असिस्ट गर्दै टोलीलाई २-० को जित दिलाएकी थिइन् । सोहि खेल रानानालाई समूह उपविजेता बन्दै सेमिफाइनलमा पुर्याउन निर्णायक बनेको थियो । दोस्रो खेलमा हापोएल जेरुसलम विरुद्ध रानाना ६-० ले पराजित भएको थियो ।

एथेना कपको फाइनल अब किर्यात गात र हापोएल जेरुसलम खेल्नेछन् । दुवै टोलीले रानानालाई पराजित गरिसकेका छन् ।

अब रानानाले अर्को विहीबार लिग अन्तर्गत पहिलो खेल खेल्नेछ । सावित्राले रामात हासारोनविरुद्ध खेल्दै लिग डेब्यु गर्नेछिन् ।