एजेन्सी – इंग्लिस युवा मिडफिल्डर जुड बेलिङहमको निर्णायक गोलमा रियल म्याड्रिडले स्पेनिस ला लिगामा लगातार तेस्रो जित निकालेको छ ।

रियलले सेल्टा भिगोमाथि उसकै मैदानमा १–० को जित निकालेको हो । रियलको जितमा २० वर्षीय बेलिङहमले गरेको गोल नै निर्णयक बन्यो । उनले ८१औं मिनेटमा गोल गर्न सफल भएका थिए ।

सेल्टाको घरेलु मैदान एवान्का वालाइडोस भिगोमा शुक्रबार राति भएको खेलको तेस्रो मिनेटमै जर्गेन स्ट्रान्डले गोल गरेपछि भिएआरबाट मान्यता नपाउँदा घरेलु टोली अग्रता लिनबाट चुक्यो । १८औं मिनेटमा रियलका भिनिसियस जुनियर घाइते भएर मैदान छाड्न पुगे । उनको स्थान जोसेलुले लिए ।

६८औं मिनेटमा रोड्रिगो पेनाल्टीमा चुक्दा रियलले अग्रता लिन सकेन । पेनाल्टी बक्समा बेलिङहमले तीन डिफेन्डरबीचबाट दिएको पासमा रोड्रिगोलाई गोलरक्षक इभान भिलारले फउल गर्न पुगेपछि रेफ्रीले सिधै रियललाई पेनाल्टी प्रदान गर्दा रोड्रिगोले गोल गर्न सकेनन् । उनको पेनाल्टीलाई गोलरक्षक भिलारले बचाइदिए ।

८१औं मिनेटमा बेलिङहमले गोल गर्दै रियललाई १–० को अग्रता दिलाए । उनले जोसेलुको पासमा गोल गर्न सफल भए । यससँगै बेलिङहम ला लिगाको सुरुवाती तीन खेलमै गोल गर्ने खेलाडी बनेका छन् ।

यसअघि क्रिष्टियानो रोनाल्डोले लगातार सुरुवाती तीन खेलमै गोल गर्न सफल भएका थिए । यसै समरमा रियल आएका उनले तीन खेल ४ गोल र १ असिस्ट प्रदान गरेका छन् ।

रियलको यो लगातार तेस्रो जित हो । यसअघि रियलले एथलेटिको बिल्वाओ र अल्मेरियालाई पराजित गरेको थियो । लगातार तेस्रो जितसँगै शीर्षस्थानमा रहेको रियलको ३ खेलबाट ९ अंक पुगेको छ । पराजित सेल्टा ३ खेलबाट १ अंक जोडेर १६औं स्थानमा छ ।