एजेन्सी – इंग्लिस प्रिमियर लिग अन्तर्गत शनिबार भएको पहिलो खेलमा टोटेनहम हट्सपरले बर्नमाउथलाई पराजित गरेको छ ।

बर्नमाउथको घरेलु मैदानमा भएको खेलमा टोटेनहमले २-० को जित दर्ता गरेको हो । टोटेनहमको जितमा जेम्स म्याडिसन र डेजान कुलुसेभस्कीले १-१ गोल गरे । खेल अवधिभर टोटेनहम नै हावी रहेको थियो ।

खेलको १४औं मिनेटमा म्याडिसनको प्रहार बर्नमाउथका ब्राजिलियन गोलकिपर नेटोले राम्रो बचाउ गरे । तर त्यसको तीन मिनेट पछि नै उनले अग्रता दिलाए ।

म्याडिसनले खेलको १७औं मिनेटमा गोल गर्दै आफ्नो टिमलाई अग्रता दिलाएका थिए । पापे साररे डिफेन्स चिरेर दिएको पासलाई सदुपयोग गर्दै उनले बललाई गोलपोस्टको दिशा देखाएका थिए ।

२३औं मिनेटमा सारको सट नेटोले सजिलै समाते । ३६औं मिनेटमा रिचार्लिसनले गोल गर्ने सुन्दर मौका खेर फाले । उनले सट लिन ढिला गरेपछि रथवेलले ट्याकल गर्दै बचाए ।

बर्नमाउथको पहिलो उल्लेखनीय अवसर खेलको ४१औं मिनेटमा मात्र आयो । सेमेन्योको बक्स भित्र बाट लिएको सट स्पर्स गोलरक्षक भिकरियोले सेभ गरेका थिए । पहिलो हाफमा थप गरिएको समयमा फिलिप बिलिङले लिएको सट पोस्टको केही टाढाबाट बाहिरियो ।

५७औं मिनेटमा समेन्योको अर्को प्रहार पनि गोलतर्फ जान सकेन । बर्नमाउथले अवसरहरू सदुपयोग गर्न नसक्दा स्पर्सले अग्रता दोब्बर बनायो । कुलुसेभस्कीले ६३औं मिनेटमा स्पर्स दोस्रो गोल गरे । उनले पोस्टको नजिकबाट ईएनोमा उडोगीको पासमा गोल गरेका थिए।

खेलको अन्त्य तिर बेन डेविस सामु थप एक गोल गर्न अवसर आएको थियो यता उनको प्रहार पोस्ट माथि बाट बाहिरियो ।

यस जित पश्चात टोटेनहम तीन खेल बाट सात अंक जोड्दै लिगको शीर्ष स्थानमा उक्लिएको छ । बर्नमाउथ भने तीन खेलमा एक अंक सहित १५औं स्थानमा छ ।

आज प्रिमियर लिगमा थप पाँच खेल हुँदैछ ।