मर्सीसाइड (एजेन्सी) – आइतबार भएको इङ्गलिश प्रिमिएर लिग अन्तर्गत म्यानचेस्टर सिटि र एभर्टनबिचको खेलमा घरेलु टोलीले पेप गुआर्डीओलाको म्यानचेस्टर सिटिलाई ४-०को भारी अन्तरले पराजित गरेको छ।
रोमेलु लुकाकुको ३४औं मिनेटको गोलले अघि बढेको एभर्टनले केभिन मिरलासले दोश्रो हाफको सुरुवातमै गोल गरेपछि दुइ गोलको अग्रता लिएको थियो। खेलको अन्त्यतिर टम डेभिस र पहिलो खेल खेल्दै गरेका लुकम्यानले गोल गरेपछि एभर्टनले ४-० को जित हासिल गरेको हो।
यो हार स्पेनिश प्रशिक्षक पेप गुआर्डीओलाको अहिलेसम्मकै सबैभन्दा खराब हार पनि रहेको छ। यसै सिजन म्यानचेस्टर सिटि आइपुगेका गुआर्डीओलाको सुरुवात राम्रो भएपनि केहि सातायता टोलीको प्रदर्शन सुस्ताएको छ। सिटि प्रिमिएर लिगको अंक तालिकामा ४२ अंकसहित पाँचौ स्थानमा छ। शिर्ष स्थानमा रहेको चेल्सीको ५२ अंक रहेको छ।
