एजेन्सी – इंग्लिस प्रिमियर लिगको साविक विजेता म्यानचेस्टर सिटीले आइतबारको खेलमा सेफिल्ड युनाइटेडविरुद्ध रोमान्चक जित दर्ता गरेको छ ।

सेफिल्डको घरेलु मैदानमा फरवार्ड एर्लीङ हालान्ड पहिलो हाफमा पेनाल्टीमा चुक्दै संघर्ष गरेपनि सिटी २-१ को जित निकाल्न सफल रह्यो । सिटीको जितमा हालान्ड र रोड्रीले १-१ गोल गरे । सेफिल्डका लागि जेडन बोगलले बराबरी गोल फर्काएपनि अंक जोड्न पर्याप्त रहेन ।

सिटीले खेलको सुरुवातदेखि आक्रमण बुन्दै घरेलु टोलीलाई दबाबमा राखेपनि गोल गर्न निकै संघर्ष गर्नुपर्यो । ३७ औं मिनेटमा सिटीले पेनाल्टीको अवसर पाएपनि हालान्डले त्यसको उपयोग गर्न सकेनन् । उनको पेनाल्टी पोस्टमा लागेर फर्किएको थियो ।

दोस्रो हाफमा सिटीले हालान्डकै गोलमा अग्रता लियो । ज्याक ग्रिलिसको क्रसमा हालान्डले फार पोस्टमा हेडरमर्फात गोल गरे ।

८३ औं मिनेटमा घरेलु टोलीले गोल फर्कायो । सेफिल्डकै पुर्व खेलाडी काइल वाल्करको गल्तीमा बोगलले गोल गर्दै खेल बराबरीमा ल्याए ।

तर ८९ औं मिनेटमा रोड्रीले सिटीलाई अघि बढाए । क्रसमा आएको बल फिल फोडेनले रोक्न नसकेपछि फुस्केको बललाई रोड्रीले पेनाल्टी क्षेत्र भित्रबाट टप कर्नरमा फिनिस गरेका थिए ।

यससँगै सिटीले लिगमा शत प्रतिशत जितको सिलसिला कायम राख्दै शीर्षस्थानमा उक्लिएको छ । सिटीको ३ खेलमा ९ अंक छ ।

अर्को खेलमा एस्टन भिल्लाले बर्नलीलाई ३-१ ले हरायो । म्याटी क्यासले २ तथा मौसा डियाबीले १ गोल गरेपछि भिल्ला दोस्रो जित दर्ता गर्न सफल रहयो ।