एजेन्सी – इटालियन प्रशिक्षक रोबर्टो मान्सिनी साउदी अरबको मुख्य प्रशिक्षकमा नियुक्त भएका छन् । इटालीको राष्ट्रिय टोलीको मुख्य प्रशिक्षकबाट राजीनामा दिएको दुई सातापछि मान्सिनी साउदी अरबको मुख्य प्रशिक्षक बनेका हुन् ।

उनी सन् २०२७ सम्म साउदीको मुख्य प्रशिक्षक रहने छन् । कोस्टा रिकाविरुद्धको खेल उनको पहिलो खेल हुनेछ । कोस्टा रिकासँगको खेल ८ सेप्टेम्वरमा हुनेछ ।

‘यो मेरा लागि राम्रो अवसर हो । एसियामा बढ्दो फुटबलको लोकप्रियतालाई हेरेर नयाँ देशको अनुभव लिने अवसर पनि हो ।’ मान्सिनीले भनेका छन् । पछिल्लो विश्वकपमा साउदी अरबले समूह चरणको खेलमा विश्व विजेता बनेको अर्जेन्टिनालाई पहिलो खेलमा २–१ ले स्तब्ध बनाएको थियो ।

५८ वर्षीय मान्सिनीले इटालीलाई सन् २०२० को युरोकपको उपाधि जिताएका थिए । वेम्बलीमा भएको फाइनलमा इंग्ल्याण्डलाई पेनाल्टीमा हराउँदै इटालीले युरोकप जितेको थियो ।

३७ खेलमा अपराजित रहेर कीर्तिमान बनाएपनि मान्सिनीले इटालीलाई सन् २०२२ को विश्वकपमा भने छनोट गराउन सकेका थिएनन् ।

मान्सिनीले सन् २०१२ मा म्यानचेस्टर सिटीलाई इंग्लिस प्रिमियर लिगको उपाधि दिलाएका थिए । उनले फियोरेन्टिना, लाजियो, इन्टर मिलान, गालाटासारे र जेनिथ सेन्ट पिटर्सवर्गको प्रशिक्षण सम्हालिसकेका छन् ।