म्याड्रिड (एजेन्सी) – स्पेनिश ला लिगा अन्तर्गत आइतबार राति भएको खेलमा सेभिल्लाले रियल म्याड्रिडलाई २-१ले पराजित गरेको छ।

यसै साता कोपा डेल रे अन्तर्गत भएको खेलमा ३-३को बराबरी खेलेका यी दुई टोलीबिचको खेलमा म्याड्रिडले क्रिस्टियानो रोनाल्डोको गोलले अग्रता लिएको थियो। रोनाल्डोले पेनाल्टिमार्फत म्याड्रिडलाई अघि बढाएका थिए।
तर, खेलको ८५औं मिनेटमा सर्जियो रामोसले आफ्नै पोष्टमा गोल गरेपछि खेल बराबरीमा आइपुगेको थियो। खेलको ९०औं मिनेटमा भिटोलोको पासलाई सदुपयोग गर्दै स्टेभन योभेटिचले गोल गरेपछि सेभिल्लाको जित सम्भव भएको थियो।
यस हारसंगै रियलको ४०खेलको अपराजित यात्रा टुङ्गिएको छ। सिजनको पहिलो हार व्यहोरेपनि अंक तालिकामा रियल शिर्षस्थानमै छ। ४० अंक जोडेको रियलले ३९अंक बोकेको सेभिल्ला र ३८अंक भएको बार्सिलोना भन्दा १ खेल कम खेलेको छ।