एजेन्सी – क्याटलान क्लब बार्सिलोनाले ट्रान्सफर विन्डोको अन्तिम दिनमा दुई स्टार पोर्चुगिज खेलाडी भित्र्याएको छ ।

स्पेनिस च्याम्पियन बार्सिलोनाले फरवार्ड जोआओ फेलिक्स र राइट-ब्याक जोआओ क्यान्सेलो लाई एक सिजन लामो लोन सम्झौता गर्दै अनुबन्ध गरेको हो ।

स्पेनिस क्लब एटलेटिको म्याड्रिडमा रहेका फेलिक्सले क्लबमा विवाद भएपछि गत सिजनको दोस्रो भाग इंग्लिश क्लब चेल्सीमा लोनमा बिताएका थिए । यस सिजन फेरि स्पेन फर्किएका उनले केही महिना अगाडि बार्सिलोना आउने ईच्छा सार्वजनिक रूपमा नै व्यक्त गरेका थिए ।

फेलिक्सलाई भित्र्याउन आर्थिक भार परेको बार्सिलोनाले अन्सु फाटीलाई एक सिजनका लागि इंग्लिश क्लब ब्राइटन पठाएको छ ।

यस्तै अर्का पोर्चुगिज खेलाडी जोआओ क्यान्सेलो पनि एक सिजनको लोन सम्झौतामा बार्सिलोना भित्रिएका छन् । म्यान्चेस्टर सिटीमा रहेका उनले पनि विवाद पश्चात गत सिजन बायर्न म्युनिखमा लोन सम्झौतामा बिताएका थिए ।

२०१६ मा ड्यानी अल्भेसले क्लब छोडेपछि बार्सिलोनाले राइट-ब्याक पोजिसनमा एकरुपता पाएको छैन । तर क्यान्सेलोले हस्ताक्षर गरेपछि जुन गुणस्तरको अभाव थियो त्यो समस्या अब नआउने विश्वास रहेको छ ।

यी दुई बाहेक आर्थिक पक्षले मारमा परेको बार्सिलोनाले यसै सिजन इल्काए गुन्डोगन, ओरियोल रोमेउ र इनिगो मार्टिनेजलाई समेत अनुबन्ध गरिसकेको छ।