काठमाडौं (हाम्रो खेलकुद) – नेपाली राष्ट्रिय पुरुष फुटबल टोली घरेलु टोलीसँगको दूई मैत्रीपूर्ण खेलका लागि म्यानमार पुगेकोछ । नेपाली टोली मंगलबार दिउँसो म्यानमार पुगेपछि म्यानमार फुटबल महासङ्घका अधिकारीहरूले याङ्गुन अन्तर्राष्ट्रिय विमानस्थलमा स्वागत गरेका थिए ।

टोलीलाई सोमबार अखिल नेपाल फुटबल संघ (एन्फां) ले म्यानमार उड्नुअघि बिदाइ गरेको थियो । नेपालले म्यानमारमा सेप्टेम्बर ८ र ११ मा हुने दुई मैत्रीपूर्ण खेल खेल्नेछ।

खेलहरू फिफा क्यालेन्डर अन्तर्गत छन् । फिफाका दिनमै मैत्रीपूर्ण खेलहरू खेलाइने भएकाले त्यसले र्‍याङ्किङमा पनि असर पार्नेछ । फिफा विश्वकप छनोटको पहिलो चरणमा अर्को महिना नेपालले लाओससँग खेल्नुअघि यो अन्तिम मैत्रीपूर्ण खेलहरु हुनेछन् ।

इटालियन प्रशिक्षक भिन्सेन्जो अल्बर्टो अनेसेले केहि दिन अघि नै अन्तिम टोलीको घोषणा गरिसकेका थिए। टोलीमा सात नया अनुहारहरु छन्। अनेसेले डिफेन्डर छिरिङ लामा, आशिष गुरुङ र अन्जन राई, मिडफिल्डर उत्सव राई तथा फरवार्ड दिनेश हेन्जन, जिलेस्पीजंग कार्की र हिसुब थपलिया लाई पहिलो पटक टोलीमा बोलाएका हुन्। टोलीमा अभिषेक बराल र कृतिशरत्न छुन्जु पनि डेब्यु गर्न बाँकी रहेको छ ।

म्यानमारविरुद्ध खेल्ने टोली :

गोलरक्षक – किरणकुमार लिम्बू, अभिषेक बराल र दिप कार्की

डिफेन्डर – सनिश श्रेष्ठ, अनन्त तामाङ, रोहित चन्द, आशिष गुरुङ, छिरिङ लामा र अन्जन राई

मिडफिल्डर – एरिक विष्ट, सुदीप गुरुङ, लाकेन लिम्बू, आवास लामिछाने, कृतिशरत्न छुन्जु, उत्सव राई

फरवार्ड – आयुष घलान, नवयुग श्रेष्ठ, अञ्जन विष्ट, मनिष डाँगी, आशिष चौधरी, जिलेस्पीजङ्ग कार्की, दिनेश हेन्जन, हिसुब थपलिया