काठमाडौं (हाम्रोखेलकुद) – नेपाल साफ यू-१६ च्याम्पियनसिपको दोस्रो खेलमा भारतसँग १-० को अन्तरले पराजित हुँदै प्रतियोगिताबाट बाहिरिएकोछ। भारतसँगको हार नेपालको प्रतियोगिताको लगातार दोस्रो हुँदै बाहिरिएको हो ।

भारतका लागि खेलको एकमात्र गोल मोहम्मद अर्बाशले खेलको ३३ औं मिनेटमा गरेका थिए। उनले विशाल यादवको पासमा बक्स भित्रबाट गोल गर्दै खेल्न भारतलाई अग्रता दिलाएका थिए। भारतलाई जित दिलाउन त्यहीँ एक गोल पर्याप्त बन्यो ।

नेपालले गोल खाएपछि केही सुधारिएको प्रदर्शन गरेपनि गोल भने गर्न सकेन । पहिलो खेलमा नेपालले बंगलादेशसँग १-० को हार बेहोरेको थियो। सोचे अनुरूप प्रदर्शन गर्न नसक्दा नेपालले दुवै खेलमा पराजय भोग्नु परेको हो । नेपाल दुवै खेला गोल विहीन बन्यो ।

नेपाली टोली एन्फा यु-१६ लिग र देशव्यापी छनोट हुँदै तयार भएको थियो। पुरानो संस्करणहरुमा यो स्तरको प्रतियोगितामा नेपालको प्रदर्शन सम्मानजनक नै रहने गर्थ्यो। नेपाल यो उमेर समूहमा दक्षिण एसियाको उत्कृष्ट टिमहरुमा गनिने गर्थ्यो। तर यो पटक भने नेपालले सोचे अनुरुप प्रदर्शन गर्न सकेन ।

नेपालको समूहबाट भारत ६ अंकका साथ समूह विजेता बन्दै सेमिफाइनलमा प्रवेश गरेको छ। नेपाललाई हराएको बंगलादेश तीन अंक सहित दोस्रो स्थानमा रहँदै अन्तिम चारमा आफ्नो स्थान पक्का गर्यो ।

अर्को समूहमा पाकिस्तानले माल्दिभ्स र भुटानलाई हराउदै छ अंकका साथ सेमिफाइनलमा आफ्नो स्थान बनाइसकेको छ। आज साँझ माल्दिभ्स र भुटान एकअर्का सँग भिड्दै छन्। यो खेलको विजेताले सेमिफाइनलमा स्थान बनाउने छ।