काठमाडौं (हाम्रो खेलकुद)– त्रिभुवन आर्मी फुटबल क्लबका फरवार्ड जिलेस्पीजंग कार्कीले राष्ट्रिय फुटबल टोलीबाट डेब्यू गर्ने पक्का भएको छ ।

म्यानमारविरुद्ध आज हुने पहिलो मैत्रीपूर्ण खेलको पहिलो रोजाईमा परेपछि उनले डेब्यू गर्ने निश्चित भएको हो । जिलेस्पी आर्मीकै अर्का फरवार्ड जर्जप्रिन्स कार्कीका भाई हुन् ।

यसअघि राष्ट्रिय टोलीको बन्द प्रशिक्षणमा परेका जिलेस्पी यसै पटक राष्ट्रिय टोलीको अन्तिम छनोटमा परेका हुन् । यसै सिजन पहिलो पटक आर्मीबाट सहिद स्मारक ए डिभिजन लिग खेल्दा उनी धेरैको नजरमा पर्न सफल भएका थिए । म्यानमारविरुद्ध आशिष चौधरी लेफ्ट ब्याकबाट खेल्ने भएको छन् ।

अखिल नेपाल फुटबल संघ (एन्फा) का अनुसार म्यानमारविरुद्धको पहिलो खेलका लागि पहिलो रोजाईमा कप्तान समेत रहेका गाेलरक्षक किरण चेम्जाङ, आशिष चौधरी, रोहित चन्द, अनन्त तामाङ, सनिश श्रेष्ठ, लाकेन लिम्बु, आभाष लामिछाने, मनीष डाँगी, आयुष घलान , अन्जन विष्ट, जिलेस्पीजंग कार्की छन् ।

अर्को महिना हुने लाओसविरुद्धको विश्व कप छनोटको तयारीको सिलसिलामा नेपाली टोली दुईवटा मैत्रीपूर्ण खेलका लागि म्यानमार पुगेको हो । आजको खेल नेपाली समय अनुसार दिउँसो ४:१५ बजे सुरु हुनेछ ।