एजेन्सी – फरवार्ड नेयमारले बोलिभियाविरुद्ध विश्वकप छनोट खेलमा ५-१ को जित दर्ता गर्दा गोल गर्दै राष्ट्रिय टोलीका लागि गरेको गोलसंख्यामा पेलेलाई उछिने । तर उनी ब्राजिलको राष्ट्रिय टोलीका लागि सर्वाधिक गोल गर्ने खेलाडीमा भने अझै पछि छन् ।

नेयमारले बोलिभियाविरुद्ध खेलमा पेनाल्टी चुकाएपनि दोस्रो हाफमा २ गोल थपेका थिए । १ सय २५ औं खेल खेलेका उनले राष्ट्रिय टोलीका लागि ७९ गोल पूरा गरे । पुरुष राष्ट्रिय टोलीका लागि सर्वाधिक गोलकर्ता रहेपनि ब्राजिलका लागि भने उनी कीर्तिमानबाट निकै टाढा छन् ।

ब्राजिलका लागि महिला राष्ट्रिय टोलीकी स्टार मार्टाले १ सय २२ गोल गरेकी छिन् । उनले १ सय ८९ खेल खेल्दै सो उपलब्धि हासिल गरेकी थिइन् । उनले गत महिना सम्पन्न विश्वकपमा छैटौं पटक उपाधिको लागि प्रयास गरेपनि असफल भएपछि राष्ट्रिय टोलीबाट सन्न्यास लिएकी थिइन् ।

पेलेले सन् १९५७ देखि १९७१ सम्म खेल्दा ९२ खेलमा ७७ गोल गरेका थिए । पेलेको गत डिसेम्बर ८२ वर्षको उमेरमा निधन भएको थ्यियो ।

यसै सिजन पेरिस सेन्ट जर्मेन छाडेर साउदी क्लब अल हिलाल पुगेका नेयमार विश्वका सबैभन्दा महँगा खेलाडी पनि हुन् । सन् २०१७ मा पिएसजीले २ सय मिलियन पाउण्ड खर्चेर उनलाई बार्सिलोनाबाट फ्रान्स ल्याएको थियो ।