काठमाडौं (हाम्रो खेलकुद) – फरवार्ड नवयुग श्रेष्ठको राष्ट्रिय फुटबल टोलीबाट ५० खेल पूरा भएको छ । घरेलु टोली म्यानमारविरुद्धको सोमबार भएको दोस्रो मैत्रीपूर्ण खेलको दोस्रो हाफमा मैदान प्रवेश गर्दै नवयुगले राष्ट्रिय टोलीबाट ५० औं क्याप जितेका हुन् ।

त्रिभुवन आर्मी फुटबल क्लबका सहकर्मी जिलेस्पीजंग कार्कीको ठाँउमा नवयुग ७२ औं मिनेटमा मैदान प्रवेश गरेका थिए । सन् २०१५ मा भारतविरुद्धको मैत्रीपूर्ण खेलमा ५५ औं मिनेटमा जगजित श्रेष्ठको ठाँउमा मैदान प्रवेश गर्दै नवयुगले राष्ट्रिय टोलीबाट डेब्यू गरेका थिए । नवयुगले राष्ट्रिय टोलीबाट ५० खेल खेल्ने क्रममा ८ खेल गरेका छन् ।

दोस्रो मैत्रीपूर्ण खेलमा नेपाल म्यानमारसँग १–० ले पराजित भएको थियो । त्यसअघि शुक्रबार भएको पहिलो खेल गोलरहित बराबरीमा टुंगिएको थियो । अर्को महिना हुने विश्व कप छनोटको तयारीका सिलसिलामा नेपाली टोली मैत्रीपूर्ण खेलका लागि म्यानमार पुगेको हो ।

नवयुग नेपालले सन् २०१६ मा बंगबन्धु गोल्डकप र १२ औं दक्षिण एसियाली खेलकुदमा स्वर्ण जित्दा टोलीको महत्त्वपूर्ण सदस्य थिए । उनी नेपालले २०१६ नोभेम्बरमै एएफसी सोलिडारिटी कप जित्दा पनि टोलीमा थिए ।

नवयुगले राष्ट्रिय टोलीका लागि १ ह्याट्रिकसहित ८ गोल गरेका छन् ।