काठमाडौं (हाम्रो खेलकुद) – कान्तिपुर मिडिया ग्रुपले मिडिया कप फुटबल प्रतियोगिताको उपाधि रक्षा गरेको छ । त्रिपुरेश्वरस्थित दशरथ रंगशालामा भएको मिडिया कपको आठौं संस्करणको फाइनलमा कान्तिपुरले पूर्व विजेता इमेज च्यानललाई टाइब्रेकरमा ५–४ गोलले हराउँदै उपाधि रक्षा गरेको हो । कान्तिपुरले ५० हजार र इमेजले २५ हजार रुपैयाँ प्राप्त गरे ।
निर्धारित ६० मिनेटको खेलमा सुनील ताम्राकारले पाँचौं मिनेटमा गोल गर्दै अग्रता दिलाएपनि ५५ औं मिनेटमा कान्तिपुरका सन्तकुमार श्रेष्ठले बराबरी गोल फर्काए । थप १५ मिनेटमा पनि दुवै पक्षबाट गोल हुन नसकेपछि खेलको निर्णय टाइब्रेकर भएको थियो ।
टाइब्रेकरमा कान्तिपुरका सन्तकुमार, सुरज मोक्तान, समिर तामाङ, निराजन कार्की र नवीन खड्काले गोल गरे । इमेजका सम्बन्धम प्रधान, जनक गुरुङ, सुनील र विजय कार्कीले गोल गरे । योद्धा थापा गोल गर्न असफल भएपछि इमेज पराजित भएको थियो ।
नेपाल ओलम्पिक संग्राहलयद्वारा आयोजित प्रतियोगितामा इमेजका देवेन्द्र महर्जन उत्कृष्ट खेलाडी तथा एपी वान टेलिभिजनका विवेक श्रेष्ठ उत्कृष्ट गोलकिपर चुनिए । रेडियो नेपाल ‘फेयर प्ले’ टिम घोषित भयो । प्रतियोगिताभर ४ गोल गरेका कान्तिपुरका सुरज मोक्तान सर्वाधिक गोलकर्ता बने ।
विजेतालाई सांसद् मोहनकुमार राई, राष्ट्रिय खेलकुद परिषद्का उपाध्यक्ष एवं नेपाल ओलम्पिक कमिटीका महासचिव लामा टेन्डी शेर्पा, नेपाल पत्रकार महासंघका अध्यक्ष डा. महेन्द्र विष्ट, नेपाल क्यान्सर अस्पतालका मेडिकल डाइरेक्टर विजेशराज घिमिरे र नेपाल मिडिया सोसाइटीका अध्यक्ष पुष्करलाल श्रेष्ठले पुरस्कृत गरे । पुस २४ गतेदेखि सुरु प्रतियोगितामा ७ टिमले लिग कम नकआउट आधारमा प्रतिस्पर्धा गरेका थिए ।
