काठमाडौँ (हाम्रो खेलकुद) – राष्ट्रिय टोलीका गोलरक्षक किरण चेम्जोङले माल्दिभ्समा ट्रस्ट एन्ड केयर (टिसी) फुटबल क्लबबाट बुधबार डेब्यू गर्दैछन् । अर्को महिना सुरु हुने त्यहाँको प्रिमियर लिगका लागि क्लबहरु तयारीमा जुटिसकेका छन् । केही दिनअघि टोलीको अभ्यासमा जुटेका किरणका अनुसार टिसीले आज गत बर्षको लिग विजेता टोली माजिया स्पोर्टस एन्ड रिक्रियसन क्लबसँग मैत्रीपूर्ण खेल खेल्नेछ ।

टिसी फुटबल क्लबका प्रशिक्षकका साथ गोलकिपर किरण ।

माल्दिभ्स क्लबसँग एक बर्षको सम्झौतापछि किरण जनवरी ९ मा माल्दिभ्स गएका थिए । किरणको यो दोस्रा विदेशी क्लब हो । उनले सन् २०१० मा चटगाँउ अबाहानीबाट बंगलादेश प्रिमियर लिग खेलेका थिए । घरेलु फुटबलमा मछिन्द्रबाट व्यवसायिक खेल जीवन सुरु गरेका किरणले लामो समय रुस्लान थ्री स्टार क्लबमा विताएका थिए । पछिल्लो एक बर्षयता उनी लक्ष्मी हुन्डाई मनाङ मस्र्याङ्दी क्लबमा आबद्ध थिए ।

टिसी फुटबल क्लबका व्यवस्थापन टोलीसँग गोलकिपर किरण ।

किरण सम्मिलित नेपाली टोलीले दुई महिना अघि मलेसियामा एएफसी सोलिडारिटी कप जितेको थियो । नेपालको अहिले सम्म ठूलो सफलतामा किरण पहिलो रोजाइमा थिए । सोलिडारिटी कपमा चारै खेल पोस्ट सम्हालेको उनले सेमिफाइनलमा लाउसविरुद्ध पेनाल्टी सुटआउटमा २ वटा पेनाल्टी रोकेका थिए । सोलिडारिटी कप जितेकै कारण २०१९ को एएफसी एसिया कपको छनोट खेल्ने अवसर पाएको छ ।