एजेन्सी – पहिलोपटक च्याम्पियन्स लिग समूह चरणमा स्थान बनाएको बेल्जियन लिग विजेता टोली रोयल एन्टवर्प विरुद्ध फराकिलो जित निकाल्दै बार्सिलोनाले सुखद सुरुवात गरेको छ ।

समूह ‘एच’मा रहेको बार्सिलोनाले एन्टवर्पलाई ५-० ले हराएको हो । बार्सिलोनाको जितमा जोआओ फेलिक्सले दुई तथा रफिन्हा, रोबर्ट लेवान्डोस्की र गाभीले १-१ गोल गरे ।

जोआओ फेलिक्सले बार्सिलोनालाई खेलको ११औं मिनेटमा नै अग्रता दिए । लगातार दोस्रो खेलमा गोल गर्ने क्रममा उनले गुण्डोगानको पासको सदुपयोग गर्दै सुन्दर गोल गरे । १९औं मिनेटमा भने फेलिक्सले गोलको अवसर निर्माण गरे । उनको क्रसमा रोबर्ट लेवान्डोस्कीले गोल गर्दै अग्रता दोब्बर बनाए ।

तीन मिनेट पश्चात नै बार्सिलोनाको अग्रता तेब्बर भयो । रफिन्हाले क्रस गर्न खोजेको बल जेल्ले बाटाइललाई लागेर पोस्ट भित्र जान पुग्दा बार्सिलोनाले आत्मघाती गोल उपहार पाएको थियो ।

५४औं मिनेटमा गाभीले अर्को गोल थपे । उनी बक्सको बायाँ तर्फ बाट राम्रो प्रहार गर्दै गोल गर्न सफल भागेका थिए । ६६औं मिनेटमा फेलिक्सले व्यक्तिगत दोस्रो गोल गरे । रफिन्हाको सुन्दर क्रसमा फार-पोस्टमा हेड मार्फत गोल गर्दै उनले आफ्नो व्यक्तिगत दोस्रो गोल गरे ।

सोही समूहमा रहेको एफसी पोर्टोले गएराति नै शाख्तर डोनेट्स्कलाई ३-१ ले हराउदै समूहमा तीन अंक जोड्न सफल भएको छ ।

च्याम्पियन्स लिगमा आज राती समूह ए, बि, सि र डी का साथ खेल हुँदैछन् ।