एजेन्सी – च्याम्पियन्स लिगमा २० वर्ष पछि फर्किएको न्युक्यासल युनाइटेडले गत वर्ष सेमिफाइनल पुगेको बलियो प्रतिद्वन्द्वी एसी मिलान सँग गोलरहित बराबरी खेलेको छ ।

लामो समय पछि फर्किएको इंग्लिश टोली निकै कठिन समूहमा परेको छ । तर न्युक्यासलले मिलानको चुनौतीलाई पार गर्दै मध्यम सुरुवात गरेको हो । खेलको अधिकांश समय आक्रमणमा मिलानको वर्चस्व रह्यो ।

१३औं मिनेटमा पोबेगाको लामो दुरीबाट लिएको प्रहारमा न्युक्यासल गोलरक्षक निक पोपले राम्रो बचाउ गरे । एक मिनेट पछि नै ओलिभियर जिरुडको प्रहारमा फेरिपनि पोप बाधक बने । १९औं मिनेटमा थियो हरनान्डेजको राम्रो प्रहार फेरिपनि पोपले बचाए ।

३२औं मिनेटमा जिरुडको प्रहार पोस्टको केही टाढा बाट बाहिरियो । ३४औं मिनेटमा पोवेगाको अर्को प्रहार जेकब मर्फिले गोललाइनबाट क्लियर गरे । ७४औं मिनेटमा राफाएल लेआओको हेडर पोपको पोस्ट भन्दा केही माथिबाट मात्र बाहिरियो ।

दोस्रो हाफमा पनि मिलानले नै प्रभुत्व जमायो । तर खेलको अन्तिमतिर न्युक्यासल केही मौकाहरु सृजना गरेको थियो । खेलको अन्तिम तिर एलियट एन्डरसनको प्रहारलाई मिलानका गोलरक्षक स्पोर्टेलियोले राम्रो सेभ गरेका थिए ।

बराबरी पछि दुवै टोलीले एक-एक अंक बाँडेका छन् ।