काठमाडौं (हाम्रो खेलकुद) – नेपाली यू-१९ फुटबल टोलीमा मुख्य प्रशिक्षक सुनिल कुमार श्रेष्ठले साफ च्याम्पियनसिपको पहिलो खेलमा पाकिस्तानसँग हारपछि सोचे अनुसार खेल्न नसकेको बताएका छन् । बिहीबर दथरथ रंगशालामा भएको खेलमा घरेलु टोली नेपाल पाकिस्तानसँग १-० गोल अन्तरले पराजित भएको थियो ।

हारपछि टोलीका मुख्य प्रशिक्षक श्रेष्ठले सोचे अनुसार खेल खेल्न नसकेको बताए । ‘आज हामीले जति सोचेका थियौं त्यस्तो खेल भएन । खेलाडीहरु सबैले मिहिनेत त गरेको थियो । मिहिनेत गर्दा गर्दै पनि भएन । अर्को खेलमा हामी गछौं’, श्रेष्ठले भने ।

‘हामीसँग प्यान बी नभएको होईन । हामीले आशा गरेको दुई जना खेलाडीले राम्रो खेल्न सकेन । बराबर हुँदा प्यान बी मा खेल्न जान ढिलो भएको थियो’, उनले भने ।

पाकिस्तानले पहिलो पटक साफमा यू-१९ प्रतियोगिता खेलेको हो । नयाँ टोलीहरु हुँदा उनीहरुको खेल पढ्न नपाएको बताए । ‘नयाँ टोलीसँग खेल्दा उनीहरुको खेल खेल्दा पढ्न पाएको थिएन । हाम्रो पनि पहिलो खेल हो । सबै नयाँ खेलाडीहरु छ । त्यसैले टिम मिल्न पनि गाह्रो भयो’, उनले भने ।

खेलको ७६औं मिनेटमा पाकिस्तानका अली जफरले लामो दुरीबाट गरेको प्रहारले जियारथ शेखको पहुँचभन्दा टाढा टप कर्नरमा जाली चुमेको थियो। अन्त्यमा त्यही गोल जितका लागि पर्याप्त भयो ।

पाकिस्तानको उक्त गोल अनपेक्षित भएको उनले बताएका छन् । ‘अनपेक्षित सर्ट आयो । गोल रक्षक त्यसमा अली तयार नभएको देखियो ‘ उनले भने ।

गोल रक्षक जियारथ शेखले उक्त समय बाहेक अन्य समय धेरै राम्रो प्रदर्शन गरेका थिए । उनको प्रशिक्षकले तारिफ पनि गरे । ‘पहिला उनले वान भर्सेस वान पनि बचाएका थिए । दोस्रो हाफमा उनीहरुको भएको एकमात्रै आक्रामण भएको थियो । त्यो बचाउन चुक्यौ हामी’ उनले भने ।

पहिलो खेलमा पाकिस्तानसँगको हारले सेमिफाइनलमा पुग्न नेपालले सोमबार माल्दिभ्सलाई हराउनु पर्ने दबाब छ । प्रशिक्षक श्रेष्ठले अहिले नै नेपाल न बाहिरिएको समेत बताए ।

‘अहिले नै हामी समूहबाट आउट भएका छैनौं हामी । माल्दिभ्ससँग खेलेपछि मात्रै हाम्रो टुङ्गो लाग्छ । हामी आउट भएका छैनौं । माल्दिभ्सविरुद्ध हामी प्रतिस्पर्धा गछौं’, उनले भने ।