काठमाडौं (हाम्रो खेलकुद) – राष्ट्रिय टोलीका भरपर्दा मिडफिल्डर रोहित चन्दले पोखरामा जारी १५औं आहा! गोल्डकपमा मनाङ मर्स्याङ्दि क्लबबाट खेल्ने भएका छन्।

विगत एक वर्षयता चोटका कारण फुटबलबाट बाहिर रहेका चन्दले मनाङबाट खेल्दै मैदानमा पुनरागमन गर्न लागेका हुन्। गत वर्ष मलेसियाको टि टिमबाट खेल्दा घुँडामा चोट बोकेपछि शल्यक्रिया गरेका रोहितले त्यसयता कुनै खेल खेलेका छैनन्।

राष्ट्रिय टिमबाट २०१५को डिसेम्बर महिनामा भएको साफ च्याम्पिएनशिपमा खेलेका रोहित चोटका कारण बङ्गबन्धु, साफ र सोलिडारीटिको उपाधि जितेको टोलीको सदस्य रहेका थिएनन्।

मनाङ्ले यस प्रतियोगिताको क्वार्टरफाइनलमा धरान फुटबल क्लबको सामना गर्दैछ। धरानले बुधबार भएको खेलमा एपिएफलाई १-०ले पराजित गरेको थियो।