एजेन्सी – क्याटलान क्लब बार्सिलोना गएराति सम्पन्न स्पेनिस ला लिगा अन्तर्गतको खेलमा माल्लोर्कासँग २-२ को बराबरीमा रोकिएको छ । बार्सिलोनाले खेलमा दुई पटक पछाडि परेको अवस्था उल्ट्याउँदै बराबरी गरेको हो ।

बार्सिलोनाका लागि राफिन्हा र फर्मिन लोपेजले गोल गरे भने मल्लोर्काका लागि भेदात मुरीकी र आब्दोन प्राट्सले गोल गरेका हुन् ।

माल्लोर्काले खेलको आठौ मिनेटमा अग्रता लिएको थियो । बार्सिलोना गोलरक्षक टर स्टेगनले दिएको पास माल्लोर्काका खेलाडीको खुट्टामा सिधै गएपछि घरेलु टोलीले अवसर प्राप्त गरेको थियो । त्यस अवसरमा मुरीकीले गोल गर्दै आफ्नो टोलिलाई अग्रता दिलाए ।

बार्सिलोनाले खेलको ४१औं मिनेटमा बराबरी गर्यो । राफिन्हाले बक्स बाहिर बाट उत्कृष्ट गोल गर्दै खेललाई १-१ को गोल अन्तरमा ल्याएका थिए ।

तर लामो समयसम्म चलेको हाफको अन्तिममा माल्लोर्काले पुनः अग्रता लियो । मुरीकिको हेडर पासमा आब्डोनले गोल गर्दै खेलमा पुनः अग्रता बनाएका थिए ।

बार्सिलोनाले ६५औं मिनेटमा लामिन यमाललाई बक्सभित्र फाउल गरेपछि पेनाल्टी मार्फत बराबरी गर्ने अवसर पाएको थियो । तर भीएआरसँगको परामर्शपछि रेफ्रीले उक्त निर्णय उल्टाउने निर्णय गरे ।

७५औं मिनेटमा बार्सिलोनाले खेलमा फेरिपनि बराबरी गर्यो । राफिन्हाको कट-ब्याकमा लेवान्डोस्कीले सट नलिँदा बल फर्मिन लोपेजको खुट्टामा आएको थियो । युवा खेलाडी लोपेजले क्लबका लागि आफ्नो औपचारिक पहिलो गोल गर्दै खेलमा पुनः बराबरी गरिएका थिए ।

खेपछि पहिलो स्थानमा रहेको बार्सिलोनाको सात खेलमा १७ अंक भएको छ । एक खेल कम खेलेको जिरोना र रियल म्याड्रिडका १६ र १५ अंक छ । उता माल्लोर्का भने सात खेलमा ६ अंक सहित १५औं स्थानमा छ ।