काठमाडौं (हाम्रो खेलकुद) – नेपाली राष्ट्रिय टोलीका डिफेन्डर अनन्त तामाङलाई नेपाल सुपर लिगको दोस्रो संस्करणको लागि ललितपुर सिटी एफसीले मार्की प्लेयरको रुपमा भित्राएको छ । ललितपुर सिटी एफसीले सामाजिक सञ्जालमार्फत अनन्तलाई अनुबन्धको घोषणा गरेको हो ।

ए डिभिजन लिगको पछिल्लो सिजन चर्च ब्वाइज युनाइटेडबाट लिग च्याम्पियन बनेका अनन्त राष्ट्रिय टोलीका नियमित डिफेन्डर हुन् । उनले राष्ट्रिय टोलीबाट ५५ खेल खेलिसकेका छन् भने ३ गोल र एक असिस्ट गरेका छन् ।

अनन्त सन् २०१५ को साफ यू–१९ च्याम्पियनसिप जित्ने नेपाली यु–१९ फुटबल टोलीका सदस्य थिए । अनन्तले २०१५ मा भारतविरुद्धको मैत्रीपूर्ण खेलबाट सिनियर राष्ट्रिय टोलीमा डेब्यू गरेका थिए।

अनन्तले २०२२ मा इस्ट बंगालबाट इन्डियन सुपर लिग खेलेका थिए । इस्ट बंगालबाट उनले एक खेल खेलेका थिए। सिजनको अन्तिम खेलमा बेङ्गलुरु एफसी विरुद्ध १–० को हारमा खेल्दै उनी इन्डियन सुपर लिगमा खेल्ने पहिलो नेपाली खेलाडी बन्न सफल भएका थिए ।

एनएसएलको दोस्रो संस्करण मंसिर ८ देखि काठमाडौंमा सुरु हुँदैछ । यस सिजनमा पहिले संस्करणका ६ र ३ नयाँ गरि कुल ९ टोलीले प्रतिस्पर्धा गर्दैछन् । विराटनगर भने दोस्रो संस्करणमा सहभागी हुनेछैन ।

यसअघि धनगढीले आशिष चौधरी, बुटवलले एरिक विष्ट र एफसी चितवनले विशाल श्रेष्ठलाई मार्की खेलाडी सार्वजनिक गरि सकेका छन् । एनएसएलको अक्सन शनिबार काठमाडौंमा हुँदैछ ।