काठमाडौं (हाम्रो खेलकुद) – नेपाली राष्ट्रिय टोलीका गोलकिपर दिप कार्की नेपाल सुपर लिग (एनएसएल) को नयाँ टोली मध्येको एक वीरगन्ज युनाइटेड एफसीमा मार्की खेलाडीको रूपमा अनुबन्ध भएका छन् ।

विरगन्जका सिइओ अरविन्द बरालले दिपले विरगन्ज युनाटेडमा मार्की खेलाडीमा आबद्ध भएको बताएका छन् । मनाङ मर्स्याङ्दी क्लबबाट गत सिजन ए डिभिजन लिग खेलेका दिप दोस्रो संस्करणको एनएसएलमा वीरगञ्जबाट खेल्ने भएका हुन् । गत सिजन ए डिभिजन लिगमा २४ खेलमा दिपले ८ क्लिन सिट राख्न सफल भएका थिए ।

राष्ट्रिय टोलीबाट ४ खेल खेलेका दिपले २ खेलमा क्लिन सिट राखेका छन् । उनी पहिलो संस्करणमा पोखरा थन्डर्सबाट खेलेका थिए । सन् २०२२ जुन मा उनले जोर्डन विरुद्ध राष्ट्रिय टोली बाट डेब्यु गरेका थिए । उनी २०१९ देखि राष्ट्रिय टोलीका सदस्य रहँदै आएका छन् ।

एनएसएलको दोस्रो संस्करण मंसिर ८ देखि काठमाडौंमा सुरु हुँदैछ । यस सिजनमा पहिले संस्करणका ६ र ३ नयाँ गरि कुल ९ टोलीले प्रतिस्पर्धा गर्दैछन् । विराटनगर भने दोस्रो संस्करणमा सहभागी हुनेछैन ।

यसअघि धनगढीले आशिष चौधरी, बुटवलले एरिक विष्ट, एफसी चितवनले विशाल श्रेष्ठ, झापाले अन्जन विष्ट र ललितपुरले अनन्त तामाङलाई मार्की खेलाडी सार्वजनिक गरि सकेका छन् । एनएसएलको अक्सन शनिबार काठमाडौंमा हुँदैछ ।