काठमाडौं (हाम्रो खेलकुद)- नेपाली राष्ट्रिय टोलीका गोलकिपर तथा नेपाल सुपर लिगको पहिलो सिजनका च्याम्पियन विकेश कुथुलाई दोस्रो संस्करणको मार्कीका रुपमा अनुबन्ध गरेको छ ।

तीन नयाँ टोली मध्ये एक इलामले आफ्नो सामाजिक सञ्जालमा कुथुलाई मार्की घोषणा गरेको हो।

त्रिभुवन आर्मी एफसीका नियमित सदस्य रहेका उनले सहिद स्मारक ए डिभिजन लिगको पछिल्लो सिजनमा सातवटा क्लिन सिट राखेका थिए ।

विकेशले सन् २०१२ मा क्यामरुनविरुद्ध राष्ट्रिय टोलीमा डेब्यु गरेका थिए। उनले नेपाली राष्ट्रिय टोलीबाट ९ खेल खेलिसकेका छन् भने २ खेलमा क्लिन सिट राखेका छन् ।

एनएसएलको पहिलो संस्करणमा विकेश काठमाडौं रेजर्सका मार्की रहदा उनले टोलीलाई आफ्नो कप्तानीमा उपाधि समेत दिलाएका थिए।

एनएसएलको दोस्रो संस्करण मंसिर ८ देखि काठमाडौंमा सुरु हुँदैछ । यस सिजनमा पहिले संस्करणका ६ र ३ नयाँ गरि कुल ९ टोलीले प्रतिस्पर्धा गर्दैछन् । विराटनगर भने दोस्रो संस्करणमा सहभागी हुनेछैन ।

यसअघि धनगढीले आशिष चौधरी, बुटवलले एरिक विष्ट, एफसी चितवनले विशाल श्रेष्ठ, झापाले अन्जन विष्ट, ललितपुरले अनन्त तामाङ र विरगंजले दिप कार्कीलाई मार्की खेलाडी सार्वजनिक गरि सकेका छन् । एनएसएलको अक्सन शनिबार काठमाडौंमा हुँदैछ ।