काठमाडौं (हाम्रो खेलकुद) – साफ यू१९ च्याम्पियनसिप २०२३ को फाइनलमा शनिबार पाकिस्तान र भारतबीच प्रतिस्पर्धा हुँदैछ । खेल साँझ ५ : ३० मा त्रिपुरेश्वर स्थित दथरथ रंगशालामा सुरु हुनेछ । भारतले दोस्रो सेमिफाइनलमा घरेलु टोली नेपाललाई टाइब्रेकरमा ३-२ ले हराउँदै फाइनलमा स्थान बनाएको हो ।

उता पहिलो पटक साफमा प्रतिस्पर्धा गरेको पाकिस्तान यू१९ टोलीले भुटानलाई सेमिफाइनलमा सडेन डेथमा ६(५ ले हराउँदै फाइनलमा स्थान बनाएको थियो ।

भारतीय कप्तान ईशान सोशोदियाले नेपाल आउनुको एकमात्रै लक्ष्य उपाधि जित्ने भएको बताएका छन् । ‘हामी यहाँ आएको एकमात्रै लक्ष्य भनेको ट्रफी जित्ने हो । पाकिस्तानसँगको खेल जीवनभर यादगर रहनेछ’, भारतीय कप्तान ईशान शिशोदियाले भने ।

पाकिस्तानका कप्तान मोहम्मद सादमले भारतविरुद्ध उत्कृष्ट खेल खेल्न तयार भएको बताएका छन् । ‘फाइनल खेल्न हाम्रा खेलाडी निकै उत्साहित छन् । भारत शीर्ष टोली हो । हाम्रा खेलाडी एकदमै राम्रो प्रदर्शन गर्नेछन्’, सादमले भने ।

पाकिस्तान समूह ए र भारत समूह बीको शीर्ष स्थानमा रहँदै सेमिफाइनल खेलेका थिए । समूह चरणमा भारतले बंगलादेशलाई ३–० र भुटानलाई २–१ ले हराएको थियो । उता पाकिस्तानले नेपाललाई १–० र माल्दिभ्ससँग १–१ को बराबरी खेलेका थिए ।