काठमाडौं (हाम्रो खेलकुद) – नेपाल पुलिस क्लबका मुख्य प्रशिक्षक चेतन घिमिरे नेपाल सुपर लिग (एनएसएल) को नयाँ टोली झापा एफसीको सहायक प्रशिक्षकमा नियुक्त भएका छन् ।

मंगलबार दिउँसो सामाजिक सञ्जालमार्फत घिमिरेलाई झापाको सहायक प्रशिक्षकमा घोषणा गरिएको हो

यद्यपि झापाले मुख्य प्रशिक्षक भने नियुक्त गरिसकेको छैन। सहिद स्मारक ए डिभिजन लिगको पछिल्लो सिजनमा घिमिरे पुलिसको मुख्य प्रशिक्षक थिए । उनले पुलिसलाई लिगको तेस्रो स्थान हासिल गराएका थिए।

एएफसी ‘ए’ लाइसेन्स होल्डर घिमिरेले विगतमा पुलिसको महिला फुटबल टोलीको प्रशिक्षक समेत रहेका छन् । ग्यारी फिलिप्स नेपाल राष्ट्रिय महिला फुटबल टोलीको प्रशिक्षक रहँदा उनी सहायक प्रशिक्षकको भूमिकामा थिए।

उनले आफ्नो खेल करियरभर पुलिसका लागि खेलेका थिए र एसिएल चोट पछि सन्यास लिएका थिए। उनले राष्ट्रिय फुटबल टोलीको प्रतिनिधित्व समेत गरेका थिए।

एनएसएल क्लब मध्ये इलामले मेघराज केसी, चितवनले भारतीय प्रशिक्षक खालिद जमील, धनगढी एफसीले युगलकिशोर राई र ललितपुरले प्रशिक्षकमा यान एन्ड्रयूलाई सार्वजनिक गरिसकेका छन्।

एनएसएलको दोस्रो संस्करण यही मंसिर ८ बाट सुरु हुँदै छ। यस पटक पहिलो संस्करणमा खेलेका ६ र नयाँ ३ गरी कुल ९ टोलीले खेल्ने छन्। खेलाडीको अक्सन समेत समाप्त भइसकेको छ।