काठमाडौं (हाम्रो खेलकुद)- फिफा विश्वकप २०२६ को एसियाली छनोटको पहिलो चरणको पहिलो खेलमा नेपालले बिहिबार (आज) लाओसको सामना गर्दैछ ।

डबल लेगको ढाँचामा खेलाइने पहिलो चरणको पहिलो खेल त्रिपुरेश्वर स्थित दशरथ रंगशालामा साँझ ५:३० बजे सुरु हुनेछ ।

दुई टोली बिचको इतिहास हेर्ने हो भने नेपाल लाओस माथि हाबी देखिन्छ । औपचारिक र अनौपचारिक गरि नेपाल र लाओसले अहिलेसम्म ४ खेल खेलेका छन् । ३ खेलमा नेपालले लाओसलाई हराएको छ भने एक खेल बराबरीमा टुङ्गिएको थियो ।

नेपाल र लाओस बीचको पहिलो खेल सन् २०१६ मे महिनामा मैत्रीपूर्ण खेलको रुपमा भएको थियो । सो खेल १-१ को बराबरीमा सकिएको थियो । दोस्रो खेल भने सोहि वर्षको नोभेम्बरमा एएफसी सोलिडारिटी कपमा भएको थियो। सो खेल निर्धारित समयमा २-२ मा सकिएपनि नेपालले पेनाल्टी शुटआउटमा जित्न सफल भएको थियो ।

गत मार्चमा काठमाडौंमा भएको प्रधानमन्त्री थ्री नेसन्स कपमा नेपालले लाओस संग दुई खेल खेलेको थियो । पहिलो खेलमा २-० जित दर्ता गरेको नेपालले सोही प्रतियोगिताको फानलमा भने २-१ को पुनरागमन जित दर्ता गरेको थियो। फाइनल खेल भने फिफा डेमा नपरेको हुँदा औपचारिक खेलमा गनिदैन।

नेपाल आज पनि घरेलु समर्थक सामु जित निकाल्दै छनोटमा सुखद सुरुवात गर्न चाहन्छ । यि दुई टोलीबीच पहिलो चरणको दोस्रो खेल असोज ३० गते लाओसमा हुनेछ ।

नेपाली फुटबल टोली

गोलकिपर–  किरण कुमार लिम्बु, दीप कार्की, अभिषेक बराल

डिफेन्डर – सनिश श्रेष्ठ, अनन्त तामाङ, आशिष गुरुङ, रोहित चन्द, अन्जन राई, आशिष चौधरी, अमृत श्रेष्ठ

मिडफिल्डर–  एरिक विष्ट, सुदिप गुरुङ, लाकेन लिम्बु, आवास लामिछाने, उत्सव राई, कृतिश रत्न छुन्जु, मनिष डाँगी

फरवार्ड –  अन्जन विष्ट, आयुष घलान, जिलेस्पे जंग कार्की, दिनेश हेन्जन, हिसुब थपलिया, सञ्जीव विष्ट