काठमाडौं (हाम्रो खेलकुद)– नेपालविरुद्ध विश्व कप छनोटको पहिलो लेगको पहिलो हाफमा लाओसले अग्रता लिएको छ । लाओसका कप्तान बौनफाचन बौनकोङले ३३ औं मिनेटमा गरेको गोलबाट नेपाल पछि परेको हो ।

नेपालले खेलमा स्पष्ट मौका भने बनाउन सकेन । १३औं मिनेटमा लाकेन लिम्बुको बक्स बाहिर बाट गरेको प्रहार गोल पोष्टको माथि बाट बाहिरिएको थियो । ३७ औं मिनेटमा आभाष लामिछानेको क्रसमा जिलेस्पी जंग कार्कीले लिएको प्रहारले पोस्टको दिशा लिन सकेन । यी दुई प्रहार बाहेक नेपालले स्पष्ट प्रहार गर्न सकेको छैन ।

बौनकोङले खेलको ३३ औं मिनेटमा अग्रता दिलाएका थिए । लाओसले आफ्नो पहिलो स्पष्ट मौकामा नै गोल गर्न सफल भएको हो । मिडफिल्डमा आयुष घलानले मिसपास गरेपछि लाओस गोल गर्न सफल भएको हो ।

चोनी वेनपासर्थले दिएको पासमा बौनकोङले सुन्दर टच लिँदै नेपालका डिफेन्डरद्वय अनन्त तामाङ र रोहित चन्द सहित गोलकिपर किरण चेम्जोङलाई बिट गर्दै गोल गर्न सफल भएका थिए।

पहिलो चरणको विश्वकप छनोट दुई लेगको फर्म्याटमा खेलाईने छ । एसियाली टोलीमा वरियतामा सबैभन्दा तल रहने २० टोली पहिलो चरण खेल्दै छन् । नेपाल र लाओस बीचको दोस्रो खेल असोज ३० गते लाओसमा हुनेछ । दुई खेलमा अग्रता लिने टोली दोस्रो चरणमा प्रवेश गर्नेछ ।